Сарапшы: Әкімдерді сайлау елдегі саяси мәдениеттің жаңа стандартына айналып келеді

Соңғы жылдары еліміздің саяси жүйесінде маңызды институционалдық өзгерістер жүріп жатыр, – деп хабарлайды Aikyn.kz сайты.

Солардың ішіндегі ең өзектісі – әкімдерді сайлау институтының кезең-кезеңімен енгізілуі. Бұл реформаның негізгі мақсаты – басқару моделін жаңарту ғана емес, халықтың еркін нақты саяси тетік ретінде орнықтыру.

Күні кеше Астанада ауыл әкімдерінің диалог-платформасы өтті. Осыған байланысты сарапшы Жақсыбек Ақтілеу бұл реформаны жергілікті демократияны нығайту жолындағы шынайы серпіліс деп бағалайды. Оның айтуынша:

«Еліміздің даму жолындағы ең негізгі, әрі шешуші деңгей – ауылдар мен аудандар. Күнделікті шешімдер дәл осы жерде қабылданып, адамдардың өмір сапасына тікелей әсер етеді. Сондықтан әкімдерді сайлау – жергілікті басқару тиімділігін арттырумен қатар, ел ішіндегі саяси мәдениеттің жаңа стандартына айналып келеді».

Сарапшының пікірінше, бұл үрдіс бұрынғыдай жоғарыдан тағайындалатын билік иесінің емес, халықпен жұмыс істей алатын, сенім артар тұлғаның келуіне жол ашады. Сонымен бірге:

«Әкім болу – мәртебе емес, күн сайын есеп беруді талап ететін үлкен жауапкершілік», – дейді Жақсыбек Ақтілеу .

Сарапшы 2021 жылдан бері ауыл әкімдерін тікелей сайлау жүйесі жұмыс істеп келе отырып, нақты нәтижелер мен реформаның қарқынына тоқталды:

- 2021 жылдан бері ауыл әкімдерін тікелей сайлау жүйесі енгізілді.

- 2 000-нан астам ауыл әкімі халықтың дауысымен сайланды.

- Социологиялық зерттеулер нәтижесі: ауыл тұрғындарының 84%-ы өз әкімдеріне сенім білдіреді.

- Аудан деңгейінде де пилоттық негізде 52 әкім сайланды.

«Әкімдер мектебі» – жаңа форматтағы дайындық алаңы

Сонымен қатар Ж. Ақтілеудің айтуынша, сайланған әкімдердің кәсіби деңгейін арттыру үшін «Әкімдер мектебі» жобасы жұмыс істеп тұр. Мұнда:

- Басқарудың заманауи әдістері үйретіледі;

- Жергілікті проблемаларды шешудің нақты практикалық дағдылары беріледі;

- Әкімдер арасында тәжірибе алмасу жүреді.

- Президенттік деңгейдегі жаңа қадам

Ауыл көшбасшылары қатысқан кеңейтілген жиында Мемлекет басшысы аудан және қала әкімдерін сайлау мәселесін Үкімет пен Парламентке тапсырды. Бұл – реформаның жаңа фазасына өтуге арналған маңызды дайындық кезеңі.

Сарапшы Жақсыбек Ақтілеудің ойынша, бұл үрдістер тек саяси жаңғыру емес, қоғамдық келісім мен сенімнің нығаюына әкеледі. Әкімдер мен халық арасындағы тікелей байланыс – жергілікті мәселелердің нақты шешім табуына ықпал етеді.