Сарапшылар артық төлемеу үшін билеттерді қай күндері сатып алу керектігін айтты

Арзан авиабилет тауып алу - оңай шаруа емес. Баға бір күннің ішінде бірнеше рет құбылуы мүмкін, ал кейде бірдей рейстердің құны бірнеше есеге басқаша болады. Сарапшылар тиімді билет табу мүмкіндігі қай күндері жоғары екенін және қандай кеңестер шынымен көмектесетінін айтып берді, деп хабарлайды Tengri Travel тілшісі Daily Express-ке сілтеме жасап.

Арзан авиабилет тауып алу - оңай шаруа емес. Баға бір күннің ішінде бірнеше рет құбылуы мүмкін, ал кейде бірдей рейстердің құны бірнеше есеге басқаша болады. Сарапшылар тиімді билет табу мүмкіндігі қай күндері жоғары екенін және қандай кеңестер шынымен көмектесетінін айтып берді, деп хабарлайды Tengri Travel тілшісі Daily Express-ке сілтеме жасап.

Билеттер қай күндері арзанырақ болады?

Money Saving Expert (MSE) сервисінің мамандары ең тиімді ұсыныстар көбіне дүйсенбінің соңында пайда болып, сейсенбі таңына дейін сақталатынын алға тартады.

Skyscanner мәліметінше, бұл уақытта сұраныс әдетте төмен болады, сондықтан әуе компаниялары жеңілдіктер мен арнайы ұсыныстар жариялауы мүмкін.

"Әдетте, апта соңы жақындаған сайын және сұраныс артқан сайын бағалар қайта көтеріле бастайды", - дейді MSE сайтының сарапшылары.

Сонымен қатар мамандар нақты "мінсіз күн" деген ұғымның жоқ екенін атап өтті. Билет құны бірден бірнеше факторға - бағытқа, маусымға, әуе компаниялары арасындағы бәсекелестікке, сұранысқа және тіпті жалпы экономикалық жағдайға байланысты болады.

Іздеуден кейін баға көтерілетіні рас па?

Ең танымал мифтердің бірі - әуе компаниялары адам бір рейсті бірнеше рет қарағаннан кейін бағаны әдейі көтереді деген түсінік.

Skyscanner мамандары іздеу тарихының өзі бағаға ешқандай әсер етпейтінін атап өтті.

Сарапшылардың түсіндіруінше, бағалар автоматты алгоритмдерге байланысты үнемі өзгеріп отырады. Жүйе сұранысты, сатылым жылдамдығын, бос орындар санын және басқа да факторларды талдайды. Сондықтан құны күрт өсуі немесе, керісінше, күтпеген жерден төмендеуі мүмкін.

"Авиабилеттердің бағасы сұранысқа, маусымға және бағытқа байланысты үнемі өзгеріп тұрады. Брондау үшін нақты "ең арзан күн" жоқ, бірақ дұрыс құралдардың көмегімен сіз жаңалықтардан хабардар бола аласыз", - деді компания өкілдері.

Бюджеттік ұшудың бес алтын қағидасы

Skyscanner деректері бойынша, билеттер көбіне үш себепке байланысты арзандайды:

рейс күтілгеннен нашар сатылып жатса; біреу бронын қайтарып, орындар қайта сатылымға шықса; әуе компаниясы уақытша акция немесе жаппай сатылым бастаса.

Жеңілдіктер әсіресе туристік сұраныс төмен кезеңдерде жиі байқалады.

Фото: depositphotos.com

Ұшу үшін артық төлемеу мақсатында сарапшылар мына бес қарапайым әдетті қалыптастыруға кеңес береді:

икемді болыңыз: сейсенбі және сәрсенбі күндері ұшыңыз, мереке күндерінен қашыңыз. Егер бағыт маңызды болмаса, "Барлық жерге" іздеу функциясын пайдаланыңыз; жеңілдіктерді қадағалаңыз: билеттерді акциялармен немесе "қате тарифтермен" сатып алып үлгеру үшін баға туралы хабарландыруларды қосып, әуе компанияларының жаңалықтарына жазылыңыз; агрегаторларды салыстырыңыз: билеттерді кем дегенде екі авиакасса сайтынан тексеріңіз. Әуе компанияларының сайттарындағы бағалар әрдайым ең төмен бола бермейді; ауысып отыратын рейстермен ұшыңыз: алыс сапарларда ауысып міну (стыковка) немесе жолдың бөлек кезеңдерін брондау жүздеген еуроны үнемдеуге мүмкіндік береді; нақты құнын тексеріңіз - тіпті ең төменгі тариф жүк, орын таңдау және қосымша қызметтер үшін ақы қосылғаннан кейін тиімсіз болып қалуы мүмкін.

Еске салсақ, жақында біз 2026 жылы қазақстандықтар визасыз бара алатын елдердің тізімін жасаған болатынбыз.

Тағы оқыңыз: Қазақстандықтарға тур сатып алу кезінде жиі жіберілетін қателік туралы ескертілді

Google News арқылы жаңалықтарымызды қадағалаңыз

Жазылу