Сарыарқа әдебиетінің жас толқыны

Қарағанды облысы мәдениет, архивтер және құжаттама басқармасының қолдауымен қарағандылық жас қаламгерлердің алғашқы кітаптары жарық көрді. Жақында ғана қолға алынған «Жас қаламгер» жобасы осылайша, жас әдеби буынның шығармашылығына шырақшы болып отыр.

Кітабы шық­қан­дардың бірі – жас прозашы Бекзат Алтынбек «Көкжиек» атты жинақтағы әңгімелеріне қалалықтардың ішкі әлемін, көзқарасын, дүниетанымын арқау ете отырып, бүгінгі күн мен келешектің мәңгілік құндылығын іздейді. Ал жас ақын Таңсәуле Әгенқы­зының нәзік лиризм мен терең сезімге толы «Бозмұнар» атты өлеңдер жинағы жас буынның сыршыл үніндей.

Жоба қолдауымен жарық көрген кітап «Жас толқын» деп аталады. Мұнда қарағандылық 14 ақынның өлеңдері енген. Қайрат Иманбеков, Ерболат Қуатбек, Ербұлан Мақатай, Нұрдәулет Бақытұлы, Нұрасыл Аманжол, Таңсәуле Әген­қызы, Шұғыла Үсен, Алданыш Олжабай, Санжар Жұмағали, Хура­лай Сейіт, Райымбек Қой­шыбай, Айтолқын Жаңа­бай, Айдана Жаркеева, Нұрға­сыр Изат есімді жас буынның сыр­шыл лирикалары топтасты­рылған.

– «Жас қаламгер» жобасы аясында бірқатар жұ­мыс атқарылып жатыр. Со­лардың сүбелісі – осы. Кітап­қа ену, кітап шығару – тарих қойнауына кететін дүние. Абай «Өлең сөздің патшасы», дейді. Ал ақын – соның иесі. Антологияға 14 ақын еніпті. Шабыттары сарқылмасын, шығармашылықтары өр­кен­десін, – деді Жа­зушы­лар одағының облыс­тағы өкілі, ақын Жанат Жаң­қашұлы.

Оқырманға олжа болар тағы бір жинақ «Сөз шеберлігіне бас­тар жол» деп аталады. Бұл кітап – жас ақындар мен жа­зушыларға арналған тә­жі­рибелік-танымдық құ­рал. Жас қаламгерлердің шығарма­шылық қабілетін дамытуға, сөз өрнегін жетіл­діруге, көр­кем ойлау мен тіл мәдениетін қалыптастыруға бағыт-бағдар береді.

Осылайша, жас ақындар сахнаға көтеріліп, жалындап тұрып өлеңдерін оқыды. Жаңа кітаптің тұсаукесер рәсімі­не ардагер журналист Әли Той­жігіт, жазушы Сүйіндік Жаныс­бай, қаламгер-ұстаз Әлімжан Құт­жан, мәдениет қайраткері Жаролла Ақы­шев қатысып, ізінен ерген іні-қарындастарының су жаңа жинағы оқырманға олжа, рухани азық болсын деп, баталарын берді.

Қарағанды облысы