Семей тұрғындарын жылумен қамтамасыз ету үшін 13,6 шақырым жылу желісі ауыстырылды

Орталық коммуникациялар қызметінің брифингінде Абай облысының әкімі Семей қаласындағы тозығы жеткен жылу қазандықтары жаңғыртылғанын айтты, деп хабарлайды Аikyn.kz.

Берік Уәлидің айтуынша, жылыту маусымына дайындық барысында арнайы талдау жасалып, жылу желілерінде анықталған ақауларды жою жұмысы жүргізілді.

– Биыл бұл мақсатқа 11,8 млрд теңге бөлінді. Аталған қаражатқа Семей қаласын жылумен үздіксіз қамтамасыз ету үшін 12 жылу көзі жаңғыртылып, 13,6 шақырым жылу желілерін ауыстыру жұмыстары атқарылды. Аягөз қаласында екі айдың ішінде (тамыз-қыркүйек айларында) «Орталық» қазандығында әрқайсының қуаты 10 Гкал/сағат болатын үш қазандық орнатылды. Сонымен қатар, 3,9 шақырым жылу желілері ауыстырылып, жылу мәселесі шешілді», - деді спикер ОКҚ алаңында өткен баспасөз конференциясында.

Сонымен қатар, Курчатов қаласында, Жарма, Бородулиха, Жаңасемей аудандарында 9 жылу көзінде және 4 шақырым жылу желілерінде жөндеу жұмысы жүргізілді.