Семейде шаруаларға 10 автокөлік сыйлады

Абай облысында ауыл шаруашылығы және қайта өңдеу өнеркәсібі қызметкерлерінің күні кең көлемде аталып өтті. Биыл алғаш рет агросала озаттарына 10 автокөліктің кілті табысталды. 

Семейдегі Абай атындағы кітапханасында өткен «Алтын күз» салтанатты шарасында өңірдің аграрлық саласында еңбек етіп жүрген үздік мамандар марапатталып, жыл бойғы еңбектің нәтижесі сараланды. Ауыл шаруашылығы еңбеккерлерінің мерекесіне облыс әкімі, қоғам өкілдері мен қала тұрғындары қатысты. 

Өңірдің ауыл шаруашылығы саласында өнім көлемі 404,3 млрд теңгеге жеткен. Мал шаруашылығында өсім байқалады. Бұған қоса қайта өңдеу саласында жаңа кәсіпорындар іске қосылып, биыл 446 жаңа техника сатып алынған. 

Берік Уәли, Абай облысының әкімі:

- Жоғарыда атқарылып жатқан жұмыстар, болашақ даму жоспарларымен қоса, биылғы жеткен жетістіктерімізді де атап өттік. Бұл жетістіктер сіздердің маңдай терлеріңіздің, қажырлы еңбектеріңіздің нәтижесі.

Биыл алғаш рет агросала үздіктеріне арнайы 10 автокөліктің кілті берілді. «Үздік шопан», «Үздік механизатор», «Үздік технолог», «Үздік тракторшы» сынды аталым иегерлері жаңа көліктерін алды. Сонымен қатар «Құрмет», III дәрежелі «Еңбек Даңқы» ордені, «Ерен еңбегі үшін», «Еңбек ардагері» медальдары табысталды.

Ержан Мэлсов, «Үздік шопан» аталымының иегері:

- Мал өсірсең, қой өсір. Пайдасы оның көл-көсір дейді. Қазіргі таңда қой шаруашылығына көп көңіл бөлу керек. Мал бағатын адамдар жоқтың қасы. Жастар әсіресе. Ауыл ел бесігі дейді ғой. Сол себепті ауылға көп көңіл бөлу керек. 

Мұхамедхан Асанбеков, шаруа:

- Осындай дәрежеге жетіп жатқаныма өте қуаныштымын! Барлықтарыңа рақмет айтамын. Дендері сау болсын, әрқашан осындай қуанышқа жете берейік. 

Мерекелік шара өңір еңбеккерлерінің кәсіби жетістіктерін атап өтіп қана қоймай, ауыл шаруашылығы саласының даму бағытын айқындады. Аграрлық сектордағы қолдау шаралары мен жаңартылған техника паркі еңбек өнімділігін арттыруға тың серпін бермек.

Авторлары: Рүстем Қайратұлы, Мәди Базарбеков