Сенат үш жылдық бюджетке өзгеріс енгізді

АСТАНА, 20 қараша – Sputnik. Сенат депутаттары үш жылдық бюджет жобасын мәжіліске қайтарды, деп хабарлайды Sputnik Қазақстан тілшісі.

Жоғары палатаның бүгінгі отырысында бюджеттің алдағы шығыстары мен кірістері талқыланды.

2026 жылы республикалық бюджетте қарастырылған негізгі шығыстар:

халықты әлеуметтік қорғауға – 6,8 трлн теңге;

денсаулық сақтау саласына - 2,7 трлн теңге;

білім және ғылым саласына – 902 млрд теңге;

мәдениет, туризм және спортты дамытуға – 263,5 млрд теңге;

экономиканың өсіміне әсер ететін шығындар -1,2 трлн теңге;

өңірлерді дамытуға – 300 млрд теңге;

әкімдіктердің дербестігін арттыру мақсатында өңірлерге трансферттер арқылы 5,1 трлн теңге;

күштік құрылымдарды қаржыландыруға – 3 трлн теңге.

Келесі жылы бюджет тапшылығы жалпы ішкі өнімге шаққанда 2,5 процент деңгейінде, ал 2028 жылға қарай ол 0,9%-ға дейін төмендейді деген болжам бар.

Сенаторлардың бір бөлігі үш жылдық бюджетті қолдады. Ал кейбіреулері өзгеріс енгізіп, мәжіліске қайтаруды ұсынды.

Жоғары палата енгізген толықтырулар:

жылумен жабдықтау жүйесін дамытуға жалпы сомасы 37,9 млрд теңге, оның ішінде 2026 жылға –9,8 млрд теңге;

жылу, электр энергетикасын дамытуға жалпы сомасы 7,7 млрд теңге, оның ішінде 2026 жылға –4,7 млрд теңге;

су ресурстарына жалпы сомасы 8,9 млрд теңге, оның ішінде 2026 жылға – 2,3 млрд теңге;

газ тасымалдау жүйесін дамытуға жалпы сомасы 5,5 млрд теңге;

жағалауды күшейту жұмыстарына 2026 жылы 2,2 млрд теңге;

өнеркәсіп салаларын дамытуға жәрдемдесуге 2026 жылы

1,5 млрд теңге.

Дауыс беру кезінде сенат депутаттары үш жылдық бюджет жобасын мәжіліске қайтаруға шешім шығарды.

Айта кетері, мәжіліс сенат енгізген өзгерістермен келіссе, үш жылдық бюджет бірден президенттің қарауына жіберіледі.