ШҚО да қараусыз қалған 4 бала өз үйінде өртеніп кете жаздады

Тілсіз жау үйдің шатырын, жиһаздарын және жеке заттарды шарпыған. Өрт болған кезде үйде анасының қарауынсыз төрт бала болған.

— 2012 және 2019 жылы туған екі үлкен бала өздері үйден шығып, көмек сұрап көрші үйге жүгірген. Көршісі Дмитрий Недозрелов, бір сәтке де ойланбастан, жанып жатқан үйге кіріп, іште қалған 2021 және 2023 жылы туған екі сәбиді сыртқа алып шықты, — делінген хабарламада.

Оқиға орнына дереу жеткен өрт сөндірушілер 45 шаршы метр аумақты шарпыған жалынды ауыздықтады. Балалар медициналық мекемеге жеткізілді. Қазіргі уақытта өрттің себебі анықталып жатыр.

Өз ерлігі туралы көпшіліке айтқысы келмеген Дмитрий оқиғаға қатысты қысқаша пікір білдірді. 

— Менің орнымда кез келген ер адам дәл солай жасар еді, — деп қысқа қайырды ол.

Еске салсақ, жақында Павлодарда ер адам әйелі мен үш баласын өрттен құтқарып, өзі құрбан болды.