ШҚО да жолаушылар тасымалына бақылау күшейді

Шығыс Қазақстан облысында полицейлер жыл басынан бері 3 мыңнан астам жолаушылар тасымалы ережесін бұзу дерегін анықтады.

Тәртіп сақшыларының мәліметінше такси қызметімен заңсыз айналысатын жүргізушілер жол-көлік оқиғаларына жиі ұшырайды. Себебі жүгенсіз жүргізушілер  алыс жолға шығар алдында медициналық тексерістен өтпейді. Сондықтан өңірде қалааралық бағытқа қатынайтын автобустарды көбейту қолға алынды.

Өскемендегі сапаржайларға полиция бекеттері қойылған. Тәртіп сақшылары такси көліктері мен шағын автобустарды тексереді.  Себебі заңсыз жұмыс істейтіндер көп. Яғни жолаушылар сақтандырылмаған және жүргізушілер күнделікті медициналық тексерістен өтпейді.

Игорь Клишин, Әкімшілік полиция басқармасы бастығының орынбасары: 

- «Тасымалдаушы», «Такси» жедел алдын алу шаралары нәтижесінде тек бір аптаның ішінде 52 заңбұзушылық анықталды. 24 көлік айып тұрағына қойылды.

Тәртіп сақшыларының такси жүргізушілеріне қатысты бақылауды күшейтуі бекер емес. Өйткені олардың қатысуымен жол-көлік оқиғалары жиі тіркеледі. Былтыр 113 жол апаты болған. 

Бір ғана мысал, 4 қараша күні Өскемен-Риддер күрежолында шағын автобус жүк көлігіне соғылып, 5 адам көз жұмды. Тергеу барысында жеңіл көліктің жүргізушсі заңсыз түрде жолаушы тасымалдаумен айналысқаны анықталды. Сондықтан өңірде қалааралық бағыттарға қатынайтын 10 маршрут қайта ашылды.

Олар арнайы лицензиясы бар, жолаушылар қауіпсіздігіне жауап беретін компаниялар. Жалпы, соңғы 2 жылда аймақта 30 дан астам қалааралық маршрут ашылды. Астана, Алматы, Қарағанды, Талдықорғанға  және Ресейдің Барнаул, Омбы қалаларына жолаушылар автобусы қатынайды.

Нариман Алмасұлы, Жолаушылар көлігі және автокөлік жолдары басқармасы басшысының орынбасары:

- Өңірде жолаушылар тасымалымен айналысатын 35 компания бар. Олар 170 бағытқа жолаушы тасымалдайды. 157 автобус маршрутының 32-сі қалааралық  бағытқа қатынайды.

Өңірдің логистикалық қажеттіліктерін ірі автопарктер қамтамасыз етеді. Олардың жанармай мен көлік жөндеуге кеткен шығындарының 80 пайызын субсидия түрінде мемлекет өтейді. Оның көлемі жылына шамамен 700 млн теңге. Тиісінше оларға қойылатын талап та жоғары. Қауіпсіздік ережесін бұзған жағдайда мемлекеттік лицензиядан айырылады. Сондықтан көліктерін үнемі техникалық тексерістен өткізіп тұрады.

Авторлары: Елдос Кәкенов, Вячеслав Ветлугин және Дмитрий Пыхтин