ШҚО ның орман шаруашылығына 176 бірлік техника берілді

Шығыс Қазақстан облысындағы орман шаруашылықтарына 176 жол талғамайтын көлік, шағын өрт сөндіру кешендері, трактор мен дрондар сатып алынды.

Жаңа жабдықтар өңірдегі 13 ірі мекеменің материалдық-техникалық базасын жаңартып, жедел әрекет ету мүмкіндігін арттырады. Мамандардың айтуынша, қолжетімді техника саны көбейген сайын оқиға орнына жету уақыты қысқарып, барлау мен мониторинг жұмысы да тиімді жүреді.

Орман шараушылықтары мынандай шағын өрт сөндіру кешендеріне мұқтаж болатын. Бұл әмбебап көліктер енді есептен шығарылған ескі машиналарды алмастырады. Инженер Бейбіт Омарбеков осыған дейін техника жетіспегендіктен өз аумағын жаяу немесе жеке көлігімен аралайтын.

Бейбіт Омарбеков, "Өскемен орман шаруашылығы" КММ директорының орынбасары:

- Техника болмай, орман ішінде жаяу жүрген кездеріміз аз емес. Нормаға сәйкес, бізге қазір 7 өрт сөндіру машинасы, шағын өрт сөндіру кешендері, ең бастысы, арнайы жабдықталған тракторлар қажет.

Енді міне талап-тілектері орындалып, жаңа техникаға қол жеткізіп отыр. 

2025 жылы өңірдің орман шаруашылықтарын қайта жарақтандыруға 26 миллиард теңге инвестиция салынды. Жасыл желекті қорғауға мұндай қомақты қаржы бұрын-соңды бөлінген емес.

Соның арқасында 170-тен астам арнайы техника, дрондар сатып алынды. Пилотсыз ұшатын аппараттар жылу сезгіш қондырғымен жабдықталған. Камера жоғарыдан өрт ошағын өздігінен анықтайды. Облыстық табиғи ресурстар басқармасы техника паркін әлі де жетілдіре түсуді мақсат етіп отыр.

Арман Есентаев, табиғи ресурстар және табиғат пайдалануды реттеу басқармасының басшысы:

- Қазір осы экономияға байланысты жаңағы қыстық түгендеу жұмыстарын атқарып жатырмыз. Жаңағы ремонт жасап, сосын жаңағы нәтижесі бойынша қорытындысы бойынша, техниканың қажеттілігін қарап, осы жылы тағы техника алу бойынша жұмыс жалғастырамыз. 

Шығыс өңірінде ел байлығы - орман алқаптарын қорғаудың тың тәсілдерін енгізіп жатыр. Соңғы 4 жылдың ішінде орман шаруашылықтарының қажеттілігіне 107 арнайы көлік алынды.

Мағауия Қалиев, Вячеслав Ветлугин, Дмитрий Пыхтин