Шымкент қаласында “Айкөл“ тұрғын ауданында су жүйесі іске қосылды

Бүгін Шымкент қаласының әкімі "Айкөл" тұрғын алабының тұрғындарымен бірге ауызсу жүйесін іске қосу рәсіміне қатысты. Жоба тұрғындармен өткен көшпелі кездесу нәтижесінде жүзеге асып отыр. Кездесу барысында тұрғындар шағынауданды сапалы ауызсумен қамтамасыз етудің өзекті мәселе екенін атап өткен болатын.

Бүгін Шымкент қаласының әкімі "Айкөл" тұрғын алабының тұрғындарымен бірге ауызсу жүйесін іске қосу рәсіміне қатысты. Жоба тұрғындармен өткен көшпелі кездесу нәтижесінде жүзеге асып отыр. Кездесу барысында тұрғындар шағынауданды сапалы ауызсумен қамтамасыз етудің өзекті мәселе екенін атап өткен болатын.

Жоба аясында ұзындығы 14,7 шақырым болатын су құбыры желісі жүргізілді. Нәтижесінде 38 абонентке - тұрғын үйлер мен әлеуметтік нысандарға толыққанды ауызсу жеткізілімі қамтамасыз етілді. Бұл өз кезегінде санитарлық-гигиеналық жағдайды айтарлықтай жақсартып, жергілікті халықтың өмір сүру сапасын арттырады.

"Су қосылды, барлығына рақмет. Енді бәрі жақсарады деп үміттенеміз. Мүмкін, бау-бақша егіп, жеміс-жидек өсіруді де қолға алармыз", - деп өз қуанышын бөлісті Шымкент қаласының тұрғыны Назым Қалыбекова.

Қала әкімі жобаны жүзеге асыруға қолдау көрсеткен демеушілерге, сондай-ақ, жұмысты сапалы әрі уақытылы орындаған мердігер ұйымға алғыс білдірді. Қысқа мерзімде нәтижеге қол жеткізуге әкімдік, бизнес өкілдері және аудан тұрғындарының бірлескен жұмысы мүмкіндік берді.

Қазіргі уақытта Шымкент қаласының ауызсумен қамтылу деңгейі 99,5 пайызды құрайды. Әкімдік бұл көрсеткішті 99,9 пайызға дейін жеткізуді жоспарлап отыр. Биыл Текесу және Қызылжар-2 шағын аудандарында су жүйесі іске қосылды. Келесі кезекте 4,5 мыңнан астам үйі бар ірі Құрсай тұрғын алабы. Мұнда ауызсу жүйесі осы айда қосылады деп жоспарланған.

"Жоспарымызға сәйкес, биылғы желтоқсан айында Құрсай тұрғын алабында ірі инфрақұрылымдық жоба іске қосылады. Жоба жүзеге асқаннан кейін қаланың ауызсумен қамтылу деңгейі 99,9 пайызға жетеді. Бүгінде Текесу және Қызылжар-2 елді мекендеріне су берілді. Бүгін сондай-ақ Айкөл тұрғын алабы ауызсумен қамтамасыз етілді", - деп атап өтті Шымкент қаласы энергетика және инфрақұрылымды дамыту басқармасының басшысы Рзабек Мендікұлов.

"Айкөл" тұрғын ауданында су жүйесінің іске қосылуы халықпен жүргізілген ашық диалог пен өмір сүру жағдайларын жақсартуға бағытталған міндеттердің жедел шешімінің нәтижесі болып отыр. Алдағы уақытта да коммуналдық инфрақұрылымды дамыту жұмыстары жалғаса бермек, бұл өз кезегінде қала тұрғындары үшін қолайлы жағдай жасауға мүмкіндік береді.

Суреттер: Шымкент ІСБ

Шымкент ІСБ ұсынған материал