Шымкентте 9 мектеп жаңғыртылды

Шымкентте 9 мектеп күрделі жөндеуден өтті. Білім ордалары озық үлгіде қайта жаңғыртылып, жаңа оқу жылынан бастап есігін ашты.

Ал жол қауіпсіздігі мен көлік инфрақұрылымын дамыту мақсатында 1100 шақырымнан астам көшеге асфальт төселді. 400 мың шаршы метр болатын жол жиегі көгалдандырылып, жаңа гүлзарлар пайда болды.

Қаладағы №9 мектеп-лицейі күрделі жөндеу жұмыстарынан кейін заманауи кейіпке енді. Өткен ғасырда салынған нысан «Келешек мектептері» үлгісінде қайта жаңғыртылып, озық оқу-әдістемелік құралдармен жабдықталды. Жалпы 2 мың оқушы жаңартылған білім бағдарламасымен қамтылды.

Нұргүл Әбдірашова, Қалалық № 9 мектеп-лицейінің мұғалімі:

- Цифрлық сауаттылықты үйреніп жатырмыз. Соны балалармен жасанды интеллект арқылы қолданып жатырмыз. Себебі балалардың қызығушылығы артады. Зерттеу барысында жаңа ой туындайды.

Енді теориялық білім тәжірибемен ұштасады. Арнайы жабдықталған кабинеттерде жаңа ғылыми жобаларға талдау жасалып, түрлі зерттеулер жүргізіледі. Мемлекет басшысының халыққа Жолдауында айтылған тапсырмасына сәйкес, биыл осындай 9 білім ұясы жаңғыртылды.

Сәрсен Құранбек, қала әкімінің орынбасары:

- Сыртын көрсең көз тоятындай кейіпке енді. Қалған 15 мектепті алдағы жылдың ішінде толық аяқтайтын боламыз.

1100 шақырым жол жөнделді

Қалада жол желісін паспорттау және диогностикалау жұмыстары жүргізілді. Нәтижесінде ұзындығы 3 мың 800 шақырымнан асатын көшелердің сапасына бағалау жүргізілді.

Ролан Ибрагимов, Қалалық жолаушылар көлігі және автомобиль жолдары басқармасының басшысы:

- Мөлтек ауданындағы елді мекендердегі көшелердің жағдайына тиісті көңіл бөлу тапсырылған болатын. Сол бағытта биыл 1100 шақырым жолға жөндеу жұмыстары жүргізіліп жатыр. Ол өз кезегінде халықтың жүріп-тұруына жақсы жағдай жасайды және де көлік кептелісін азайтады. Өйткені жақсы жол балама жолдармен орталыққа түспей жүріп кетуге мүмкіншілік береді.

Ал Қонаев атындағы даңғылды ұзарту мен А-2 айналма бағытын күрделі жөндеу жұмыстары аяқталуға жақын. Транзиттік тасымалды жандандыру мақсатында қолға алынған ірі жобаның жетінші кезеңі аяқталды.

Транзиттік жүк көліктері елдің оңтүстік қақпасына осы жерден шығады. Республикалық маңызға ие айналма жол арқылы күніне 20 мыңнан астам көлік қатынайды. Қазір мұнда құрылыстың қызған шағы. Жер бедері тегістеліп, ескі қос жолақты жол жиегі 50 метрге дейін кеңейтіліп жатыр.

360 млрд теңге инвестиция тартылды

Соңғы 2 жылда қанағаттанарлық күйдегі жолдардың үлесі 75%-тен 90% жетті. Бұл орта және шағын бизнеске оң әсер етті. Кәсіпкерлікті қолдауға бағытталған мемлекеттік бағдарламалардың арқасында бір жылда 360 млрд теңге инвестиция тартылды. Өңдеу өнеркәсібінде 42 жоба жүзеге асырылып, 1600 жаңа жұмыс орны ашылды.

Мақсұт Исабаев, Аяқ киім фабрикасының бас директоры:

- Арнайы экономикалық аймақта бізге жер тегін берілді. Инфрақұрылым толық бар. Салықтық жеңілдіктер де бар. Қазақстанды толық қамтып, өнімді көбейтуге тырысамыз.

24 гүлзар ашылды

Шымкентте жасыл белдеу аумағы екі есе ұлғайды. 400 мың шаршы метр жерге көгал төселіп, емен, үйеңкі, қарағаш тұқымдастырының мыңдаған көшеті егілді. Жалпы 2 жылдың ішінде 24 гүлзар салынып, тағы 2 саябақ ел игілігіне берілді. Табиғатпен үндескен тіршілік тұрғындарға жайлы орта сыйлады.

Мақсатты пайдаланылмаған жер учаскелерін мемлекет меншігіне қайтару жұмыстары қарқын алды. Сот шешімімен жалға беру туралы шарттардың күші жойылып, «Қиял әлемі», «Кең баба» саябағындағы заңсыз тұрғызылған ойын-аттракциондары алынып тасталды. Сала мамандарының айтуынша, оның орнына тұрғындар серуен құратын жайлы саябақ пайда болады.

Авторлары: Нұрсұлтан Мұхамеджан, Нұрмахан Бекмұратов, Нұрмахан Мұсатов