Шымкентте туылған үшемдер үйіне шығарылды

Мегаполисте 1 ай бұрын дүниеге келген үшемдер бүгін үйіне шығарылды, – деп хабарлайды Aikyn.kz Шымкент қаласы әкімінің баспасөз қызметіне сілтеме жасап.
2025 жылғы 28 қараша күні Айгерім есімді келіншек ота жолымен үшем қызды дүниеге әкелді. Салмақтары 1300-1500 грамм аралығында болған нәрестелер алғашқы тәулікте қалалық перзентханадағы жансақтау бөлімінде дәрігерлердің бақылауында болып, кейіннен 39 күн бойы нәрестелер патологиясы бөлімінде ем қабылдады.
Ал 5 қаңтар күнгі жағдай бойынша сәбилер салмақ қосып, 2300 грамға дейін жетті. Қазіргі таңда нәрестелер мен ананың жағдайы тұрақты. Уақтылы көрсетілген медициналық көмектің нәтижесінде үшем өмірге сәтті бейімделіп, қалыпты дамуда.
Айта кетейік, 2025 жылы Шымкент қаласында 27 457 сәби дүниеге келген. Оның ішінде 286 егіз және 5 үшем бар.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.