Silk Way Star байқауы мәреге жетті

Моңғолия әншісі Мишель Джозеф Астанада өткен Silk Way Star халықаралық байқауында жеңіске жетті. Бірнеше аптаға созылған мегажобаны қазақстандық көрерменнен бөлек, шет елдерден миллиондаған адам тамашалады. Финалда Қазақстан, Армения, Грузия, Қытай, Малайзия, Моңғолия және Өзбекстан намысын қорғаған жеті өнерпаз өнер көрсетті. 

Әр әнші ана тілінде ән шырқап, өз халқының мәдени мұрасын және вокалдық стилін көрсетті. Жоба жеңімпазы қазылар алқасының бағалауымен және silkwaystar.org сайтындағы онлайн дауыс беру нәтижесімен анықталды. Жеңімпаз есімін әнші Димаш Құдайберген хабарлады. 

Жоба Қазақстан Президенті Телерадиокешені мен Қытайдың China Media Group медиа корпорациясы арасындағы келісім аясында жүзеге асырылды. Ал іс-шараға арнайы келген Қазақстан Республикасының Мемлекеттік кеңесшісі Ерлан Қарин Қазақстан Президенті Қасым-Жомарт Тоқаевтың құттықтау хатын оқып берді. 

Ерлан Қарин, Қазақстан Республикасының Мемлекеттік кеңесшісі:

- Бұл – Азия елдерінің рухани ынтымақтастығын нығайтып, халықтарымыз арасындағы достығын бекемдей түсетін бірегей бастама. Silk Way Star мәдени дипломатияның айқын көрінісі. Ұлттарымыздың салт-дәстүрі мен шығармашылығын паш ететін тамаша жоба. Осындай ауқымды іс-шаралар ынтымағымызды күшейтеді, ортақ құндылықтарымызды жан-жақты дәріптейді.

Раушан Қажыбаева, Қазақстан Президенті Телерадиокешенінің бас директоры:

- Биыл маусым айында Қазақстан Республикасының Президенті Қасым-Жомарт Кемелұлы Тоқаев пен Қытай Халық Республикасының Төрағасы Си Цзиньпин мырзаның кездесуінде 12 мемлекет қатысатын халықаралық музыкалық жобаны бастау туралы құжатқа қол қойылды. Осы идеяның авторы Ерлан Тынымбайұлына, Jibek Joly телеарнасына сенім білдіргені үшін шынайы алғысымды айтамын. Сондай-ақ қытайлық әріптесіміз China Media Group ұжымына және оның жетекшісі Шей Хан Сю мырзаға жан-жақты қолдау көрсеткені үшін көп рақмет!