Silk Way Star жобасы қорытындыланды

Silk Way Star байқауының жеңімпазы Мишель Джозефтің альбомы қазақ тіліндегі әуендермен толығуы мүмкін.

Бүгін арнайы ұйымдастырылған баспасөз конференциясында Моңғолия әншісі қазақстандық өнерпаздармен ән шырқауға ниетті екенін айтты. Сөйтіп, екі елдің мәдениетіне үлес қосуға дайын екенін жеткізді. 

Тамызда бастау алған Silk Way Star байқауы мәресіне жетті. Аз ғана уақытта көрерменнің ықыласына бөленген жобада 12 елдің өнерпазы бақ сынасты. Финалға шыққан қатысушылардың арасынан Моңғолия әншісі Мишель Джозеф үздік танылып, жеңіске жетті. Жас әнші конкурстан кейін ұйымдастырылған баспасөз жиынында өз сөзін алғыс айтудан бастады. 

Мишель Джозеф, Silk Way Star байқауының жеңімпазы:

- Ең алдымен маған дауыс беріп, мені қолдаған жандарға алғысымды білдіремін. Әсіресе Қазақ еліне көп рахмет. Негізі Қазақстан мен Моңғолия бір-біріне жат емес. Екі елдің тарихы мен мәдениеті ұқсас бауырлас ел деп нық айтуға болады. 

Баспасөз конференциясында Мишель Джозеф Қазақстанды жатсынбайтынын және қазақ тілінде ән шырқауға әзір екенін жеткізді. Тіпті байқауда өзімен қатар өнер көрсеткен қазақстандық қатысушымен бірігіп, жаңа туындыларды шығаруға ниеті бар екенін айтты.  

Мишель Джозеф, Silk Way Star байқауының жеңімпазы:

- Байқау Қазақстанда болған соң осы елде менің қолдаушыларым пайда болды. Қазақтың тілі мен мәдениеті өте бай. Болашақта осы тілді толық меңгеріп, ән шырқау ойымда бар.

Silk Way Star мегажобасы әділдігімен талайды тәнті етті. Онда өнерпаздарды бағалау тәсілі ашық, яғни дауыстың 50 пайызы қазылар алқасында, ал тең жартысы көрерменге тиесілі болды. Әншілерді алыс-жақын елдерден 508 мың адам бағалады. 

Еркежан Күнтуған, "Jibek Joly/Silk Way" телеарнасының басқарушы директоры:

- 5 бірдей мемлекетте тікелей эфирде өтті. Сіздер Жібек жолы телеарнасынын қазақ тілінде көрсеңіздер, біздің Силкуэй телеарнасында 6 тілде тарады. Өздеріңіз білесіздер, Евровидение секілді конкурстың барлығы әрбір елде сол елдің тілінде таратылады. Комментаторлар қойылады, солар аударып беріп отырады. Дәл осы жұмысты біздер жасадық. Силкуэй стар арнасында тікелей эфиріміздің сигналын қабылдап алып жатқан сырт елдердің барлығы  синхронды аударма арқылы қырғыз, өзбек, ағылшын, түрік тілдерінде осы жобаны көрсетті.

Аталмыш жобаны Қазақстан Республикасы Президентінің Телерадио кешені мен Қытайдың CHINA MEDIA GROUP корпорациясы бірігіп, алғаш рет біздің елімізде ұйымдастырды. Баянды бастама келер жылы Қытайда жалғасады деп жоспарланып отыр. 

Альмира Оразбай