Мектеп оқушыларына күн сайын 2 сағат дене тәрбиесі сабағы енгізілді шетелдегі қазақ баспасөзі

Өзбекстанда жасанды жаңбыр жаудыру бойынша пилоттық жоба жасалады — ӨзА 

Өзбекстанда жасанды жаңбыр жаудыру технологиясын ғылыми негізде әзірлеу және пилоттық жобаны іске қосу жоспарланып отыр. Бұл 2026 жылға арналған мемлекеттік бағдарламада көрсетілген. Жоба бойынша жұмыстар 2026 жылдың 1 наурызынан басталады.

Бұл туралы осы аптада «ӨзА» ақпарат агенттігі мәлімдеген болатын. 

Хабарламада айтылуынша, аталған жобаны әзірлеу барысында бұл бағытта әлемнің жетекші елдері саналатын Франция, Қытай және Сауд Арабиясы тәжірибесі зерделенетін болады.

Сонымен қатар құжатқа сәйкес, жоба іске қосылғаннан кейін жауын-шашын көлемі табиғи жағдаймен салыстырғанда 10–20 пайызға дейін артуы мүмкін.

— Жарлықта су ресурстарын ұтымды пайдалану және қолда бар қорларды үнемдеу мәселесіне ерекше назар аударылған. Атап айтқанда, үш жыл ішінде 10 мың шақырым ашық дренаж жүйесін жабық жүйеге көшіру жоспарланып отыр, деп жазады «ӨзА».

Айта кетейік, бағдарлама аясында 504 мың гектар жерге су үнемдейтін технологияларды енгізу көзделген. Нәтижесінде 5 миллиард текше метр су үнемделеді деп күтілуде.

Сондай-ақ «ӨзА»-да «Түркі елдері сауда бойынша ынтымақтастық меморандумына қол қойды» деген тақырыптағы ақпарат жарияланды.

Аталған БАҚ-тың дерегінше, Түркі мемлекеттері ұйымына мүше елдер сауда саласындағы ынтымақтастық жөніндегі бірлескен коммюнике мен өзара түсіністік туралы меморандумға қол қойды.

Осыған қатысты Түркі мемлекеттері ұйымы (ТМҰ) Экономика және сауда министрлерінің 14-отырысы Түркістан қаласында өтті.

Жиында көпжақты сауда мен инвестицияны дамыту, цифрлық трансформация, көлік және логистика, сондай-ақ Орта дәліздің тиімділігін арттыру мәселелері талқыланды.

Қазақстан ғылыми белсенділік бойынша жоғары орында тұр — Eurasia Today

Қазақстан Орталық Азия елдері арасында ғылыми белсенділік бойынша SCImago Country Rank халықаралық рейтингінде бірінші орын алды, деп хабарлады Eurasia Today.

Аталған басылымның Қазақстан Республикасы Ғылым және жоғары білім министрлігінің баспасөз орталығына сілтеме жасап хабарлауы бойынша, Қазақстан SCImago Research Group халықаралық ғылыми белсенділік рейтингінде Орталық Азия елдері арасында бірінші орынды иеленіп, аймақтағы жетекші орнын тағы айқындады.

Келтірілген деректерге сүйенсек, Қазақстан 1996-2024 жылдар аралығындағы дерек бойынша әлемдік тізімде 69-орынға тұрақтаса, 2024 жылдың қорытындысы бойынша 64-орынға жоғарылады.

Қазақстанның көрсеткіші Орталық Азия елдерінен едәуір жоғары. Өзбекстан 83-ші, Қырғызстан 130-шы, Тәжікстан 147-шы, ал Түркіменстан 191-шы орында тұр. Бұл айырмашылық ғылымды қаржыландыру деңгейі, зерттеу инфрақұрылымының дамуы, кадрлық әлеует, халықаралық ынтымақтастық және жарияланым сапасы секілді негізгі көрсеткіштердегі басымдықты білдіреді.

Иран ақындарының 100 шығармасы қырғыз тілінде жарияланады — ParsToday

Иранның мәдени орталығы және Қырғызстан Жазушылар одағымен бірлесіп, ирандық ақындардың 100 шығармасының қырғыз тілінде жариялануы екі халық арасындағы мәдени және әдеби дипломатияны нығайтудағы жаңа қадам болып табылады, деп жазды ParsToday ақпарат агенттігі.

ParsToday-дың IRNA агенттігіне сілтеме жасап хабарлауынша, Қырғызстандағы Иранның мәдени кеңесшісі Абдолреза Сейфи мен Қырғызстан Жазушылар одағының төрағасы Каныбек Иманалиев Бішкекте өткен кездесу барысында екі тарап әдеби ынтымақтастықты дамытуға және Иран ақындарының 100 шығармасын қырғыз тілінде жариялауға келіскен. Бұл келісімге сәйкес, шығармалардың парсы тіліндегі мәтінін Иранның мәдени кеңесшісі қамтамасыз етеді, ал аударма мен басып шығару процесін Қырғызстан Жазушылар одағы жүзеге асырады. Осылайша қырғыз аудиториясы қазіргі заманғы Иран әдебиетімен жақсырақ танысатын болады.

Иранның мәдени кеңесшісі Абдолреза Сейфи ортақ мәдени мүмкіндіктерді атап өтті.

Оның айтуынша, әдебиет — ұлттардың ортақ тілі, ал ирандық ақындардың 100 шығармасын қырғыз тілінде жариялау Тегеран мен Бішкек арасындағы мәдени байланыстарды тереңдете алады.

Қырғызстан Жазушылар одағы басшысы да бұл жоспарды құптап, оны екі жақтың да кітап саласындағы жазушылары мен белсенділері арасындағы өзара әрекеттесуді кеңейтуге арналған платформа деп атады.

Сондай-ақ әлемдік іс-шарамен бірге мәдени дипломатияны нығайту туралы сөз болған.

1200 жылдық камфора ағашы өрттен зардап шекті — Жэньминь жибао

Хунан өлкесінің Даушян ауданы аумағында шамамен 1200 жылдық байырғы камфора ағашы өрттен зардап шекті. Оқиға 9 ақпанда болған. Бұл туралы осы аптада жергілікті орман шаруашылығы басқармасына сілтеме жасап Жэньминь жибао хабарлайды. 

Ведомство мәліметінше, азамат жасына толмаған екі бала ағаш діңінің қуысына пиротехникалық бұйымдарды лақтырып, соның салдарынан ағаш ішінен өрт тұтанған. Ағаштың биіктігі шамамен 20 метр, діңінің жуандығы 3,2 метр болған. Діңі мен ірі бұтақтарының өзегі кеуектеніп, майлылығы жоғары болғандықтан, өрт ошағы көмескі күйде ұзақ сақталып, толық сөндіру жұмыстары 7 сағатқа созылған.

Мамандардың сараптамасына сәйкес, өрт барысында ағаштың ішкі шіріген бөлігі күйгенімен, қабығы мен талшықты қабаты негізінен сақталған. Сондықтан ағаш толық қурап кетпеуі мүмкін.

Қытайлық басылымның мәліметінше, қазіргі уақытта жергілікті орман шаруашылығы органдары ағашты қалпына келтіру және күтім жұмыстарын жүргізіп жатыр. Сонымен қатар оқиғаға қатысты тұлғаларды жауапкершілікке тарту үшін тексеру басталған.

Айта кетейік, осыған ұқсас жағдайлар бойынша бұған дейін де жауапкершілік жүктелген. Мәселен, 2025 жылғы 27 қаңтарда пиротехникалық бұйымдарды пайдаланудан шыққан өрт салдарынан тұрғын үйге зиян келтірілген іс бойынша сот ата-анасын 330 мың юаньнан астам өтемақы төлеуге міндеттеген. Ал 2024 жылғы 12 ақпанда Гуандун өлкесінің Мэйчжоу қаласында жасөспірімдердің әрекетінен орман өрті шығып, қамқоршыларына орманды қалпына келтіру шығыны мен айыппұл төлеу жүктелген.

Құзырлы органдар ата-аналарды балаларға пиротехникалық бұйымдарды қауіпсіз пайдалану талаптарын түсіндіруге шақырды.

Орта және бастауыш сынып оқушыларына күн сайын 2 сағат дене тәрбиесі сабағы енгізілді — CNR

Барлық өңірлерде орта және бастауыш сынып оқушыларына күн сайын 2 сағат дене тәрбиесі сабағы және сабақ арасындағы 15 минуттық үзіліс белгіленді, деп хабарлайды Қытайдың «Орталық халық радиосын».

Қытайлық басылымның 25 ақпанда Оқу-ағарту министрлігі мәліметіне сүйеніп хабарлауынша, аталған шара оқушылардың денсаулығын нығайту және қозғалыс белсенділігін арттыру мақсатында енгізілген.

Министрлік дерегіне сәйкес, 2024 жылы ел көлемінде оқушылардың дене дайындығы мен денсаулық көрсеткіштерін кешенді тексеру нәтижесінде жоғары, орта және бастауыш сынып оқушыларының жалпы дене сапасының жақсы деңгейі 2016 жылмен салыстырғанда 9,3 пайызға артқаны анықталған.

FIFA билеттері қырық есеге дейін жоғары бағамен сатылуда —  TRT

2026 жылғы әлем чемпионатының билеттерінің бағасы FIFA-ның ресми қайта сату платформасында 143 750 долларға дейін көтерілді.

2026 жылғы әлем чемпионатының билеттері FIFA-ның ресми қайта сату платформасында қымбаттады, негізгі сату кезеңі қаңтар айында аяқталып, билеттердің көбі жаңадан таратылғанына қарамастан, көптеген матчқа арналған орын өз құнынан бірнеше есе жоғары бағамен тізімге енгізілді, деп хабарлайды Түркия Радио Телевизия порталы. 

Аталған БАҚ-тың мәліметінше, FIFA президенті Джанни Инфантино билеттердің қайта сату сайттарында шамадан тыс бағамен сатылуы мүмкін екенін ескерткеннен бірнеше апта өткен соң бұл алаңдаушылықтар әлем футбол ұйымының өз платформасында шындыққа айналды.

Айта кету керек, сәрсенбі күнгі дерек бойынша, 11 маусымда Мехикодағы «Ацтека» стадионында өтетін Мексика мен Оңтүстік Африка арасындағы ашылу матчы үшін «үшінші санаттағы» орын 5 324 доллар болып көрсетілді, дәл сол билеттердің бастапқы бағасы 895 доллар еді.