СҚО да 112 елді мекен көктемде су басу қаупі бар аймақта тұр

СҚО Төтенше жағдайлар департаменті басқармасының бастығы Әсет Шайкиннің айтуынша, өңірде Есіл, Шағалалы, Сілеті, Қамысақты өзендерінің және олардың салаларының тасуы, көлдердің толып, арнасынан асуы, сондай-ақ еріген қар сулары қауіп төндіреді.

Мәселен бес мыңға жуық тұрғыны бар 38 елді мекен көктемде тасуы мүмкін өзендердің маңында орналасқан. 300-ге жуық тұрғыны бар 12 елді мекенге көлдердің толып, жайылуы әсер етуі мүмкін. Ал 1,7 мың тұрғыны бар 62 елді мекен еріген қар суының жолында жатыр.

- Ақпан мен наурыздың басында қар жауады деген болжам бар, сол себепті қар қоры әлі де толығады. Егер күн күрт жылынса, өзен-көлдердегі су деңгейі қауіпті межеге дейін көтерілуі мүмкін. Өңірде су тасқыны кезеңіне дайындық аясында 37 инженерлік іс-шараны қамтитын арнайы жоспар жүзеге асырылды. Нәтижесінде, 23 шақырымнан астам қорғаныс бөгеттері салынды және нығайтылды, 15 су өткізу құбыры орнатылды, 14 шақырымнан астам арықтар тереңдетіліп, тазартылды, 2 шақырым шағын өзен арналары тазаланды, - дейді Әсет Шайкин.

Төтенше жағдайларға жедел әрекет ету үшін 2,2 мың адам және 1,4 мың шамасында техника дайын тұр. Құрамында ТЖД, медицина қызметі, Ұлттық ұлан, жергілікті атқарушы органдар, Қорғаныс министрлігі және полиция өкілдері бар.

- 26 желтоқсаннан бастап Петропавл әуежайында Ми-8 тікұшағы кезекшілікке қойылды. Ол су тасқыны қаупіне жедел әрекет етуге, мониторинг жүргізуге және қажет болған жағдайда эвакуация жасауға пайдаланылады. Облыста 23,6 мың тонна инертті материал қоры әзірленді. Бүгінге дейін елді мекендерден 398 мың текше метр қар шығарылды. Халықты уақытша орналастыру үшін 15,5 мың адамға арналған 283 эвакуациялық пункт дайындалды, - дейді басқарма бастығы.

Маманның айтуынша, Есіл және басқа да шағын өзендерде мұз кептелістерінің алдын алу үшін Петропавл қаласы мен жеті аудан 84 млн теңге бөліп, жарылыс жұмыстарын жүргізуді жоспарлап отыр.

Бұған дейін Тараз қаласында қалың қардан кейін су тасқынының алдын алу шаралары жүргізілгенін жазған едік.