СҚО тұрғыны қағазды екінші рет іске жаратып, түрлі бұйымдар жасайды

Есіл ауданы Заградовка ауылының тұрғыны алдымен қағаздан түтікше орайды.

Ол үшін А4 форматтағы қағазды ұзынынан екіге бөліп, соның жартысын тоқитын сымның көмегімен орайды, ұшын желіммен бекітеді. Кейін тоқуға осы түтікшелерді қолданады. 

Фото: Ақерке Дәуренбекқызы /Kazinform

— Қолданылған қағазды лақтырып, пешке жаққаннан гөрі оны екінші рет пайдаланған дұрыс қой. Жұмысыма негізінен газетті және А4 форматтағы қағазды пайдаланамын. Офистік қағазбен жұмыс істеу ыңғайлырақ, форманы жақсы ұстайды, мықты, әдемі болып келеді. Газет жұмсақ, икемге көнгіш, балаларға үйреткенде газетті қолданамын, — дейді шебер.

Фото: Ақерке Дәуренбекқызы /Kazinform

Эльвира Жахина мектепте кітапханашы болып жұмыс істейді. Кабинетінің іші кірсе — шыққысыз.

Сондықтан да болар, сабақтан үзілісте балалар кітапханадан табылады. Бұл жерде тоқылған ыдыс-аяқ та, түрлі өсімдік-құстар да, ертегі кейіпкерлері де бар. 

Фото: Ақерке Дәуренбекқызы /Kazinform

— Людмила есімді әріптесім бар, бірде оның тоқыған вазасын көріп, қатты қызықтым. Ол дайын бұйымдарын бояу үшін кәдімгі йодты қолданады. Мен әрі қарай ізденіп, тоқылған заттар әдемі болуы үшін арнайы бояулар қолданамын. Ең қымбаты — дайын бұйымға қолданылатын лак. Алтын, күміс түстес арнайы бояулары баллондарда сатылады, олардың да бағасы арзан емес. Желім де көп керек, өйткені түтікше етіп оралған әр қағазды желімдеу қажет, — дейді Эльвира Жахина.

Фото: Ақерке Дәуренбекқызы /Kazinform

Бұл өнер өткен ғасырда пайда болған.

Шебердің айтуынша, осы тәсілмен түрлі затты, тіпті, дизайнерлік жиһазды да тоқып шығуға болады. 

Фото: Ақерке Дәуренбекқызы /Kazinform

— Бұл жұмыста ең қиыны — шыдамдылық. Көп еңбекті талап ететін жұмыс. Тапжылмай отырып істеуге көбінің шыдамы жетпейді. Әрі қиялың ұшқыр болуы керек. Кейде шабытың түн ортасында оянуы мүмкін, мұндайда қызығына беріліп, түннің бір уағына дейін айналысуым мүмкін. Тоқуы қиын емес, оны белгілі бір формаға келтіру қиын. Бір бұйымды бірнеше күн істейтін кездерім болады. Мысалы мына аққуы бар композицияны алайық, мұндағы әр бөлшек жеке-жеке тоқылып, кейін бәрі қосылады. Ауылда тұрғаннан кейін үй шаруасы жетерлік. Әрі жұмысым бар. Сондықтан хоббимен айналысуға кейде уақыт жетпей қалады. Бірақ бұл іс маған қатты ұнайды. Демаламын, басқа әлемге енгендей боламын, тоқып отырып. Ал идея жұмыс барысында келеді көбіне, — дейді шебер. 

Фото: Ақерке Дәуренбекқызы /Kazinform

Түрлі байқауларда жоғары баға алғанымен, ол жасаған бұйымдарын сатпай, көбіне достарына, туған-туыстарына сыйлағанды жөн санайды. 

Фото: Ақерке Дәуренбекқызы /Kazinform

Бұған дейін киіз үй жабдықтарын тоқитын қолөнер шебері Қалимаш Кәрімбердиева жайында жазған едік. 

Фото: Ақерке Дәуренбекқызы /Kazinform Фото: Ақерке Дәуренбекқызы /Kazinform Фото: Ақерке Дәуренбекқызы /Kazinform