СҚО да шебер оқушы шағын макет жасайды

Солтүстік Қазақстандық оқушы ұмытыла бастаған естеліктерді жаңғыртудың ерекше әдісін ойлап тапты, деп хабарлайды 24KZ. Ол Петропавлдағы танымал орындардың ондаған жыл бұрынғы көрінісін бейнелейтін шағын көшірмелер жасайды. Шебер оқушы макеттер мен диорамаларды жасау үшін мата қиындылары мен босап қалған картон қалдықтарын қолданады.

90-шы жылдардағы автобус аялдамасы. Бұл Валерияның ең алғашқы жұмысы. Әуесқой суретшілердің қолтаңбасы қалған, сыртына хабарландырулар парақшасы ретсіз жапсырылған павильонды дәл бейнелеген. Шағын макет арқылы 30 жыл бұрынғы кезеңді еске түсіреді. «Ермек үшін басталған қызығушылық кейін біртіндеп шығармашылыққа айналды», – дейді оқушы.

Валерия Квасных, оқушы:

- Менің жұмыстарыма қарап, көп адам өткен уақытын еске алып, алғыстарын айтады. Дегенмен алғыс алу үшін жасамаймын. Ұсақ моторика мен бөлшектерден үлкен дүние жасау маған рақат сыйлайды. Осы арқылы 90-шы, 2000-шы жылдардағы атмосфераны көрсеткім келеді.

Валерияның бөлмесі үнемі картон қағаз бен түрлі-түсті матаның қиындыларына толы. Сырлы бояудың жағымды жеңіл иісі бар. Ол қолына түскен кез келген бөлшекті шығармашылық жұмысына тиімді пайдалана біледі. «Жасаған макеттерімнің ішінде өзіме қатты ұнайтыны – ата-анамның үйінің көшірмесі», – дейді. Салмағы 1 келіге де жетпейтін диорамада барлығы шынайы. Тіпті табиғи мүкті де пайдаланған. Кеш батқанда макет үйдің ішінде жарық жанады.

Галина Квасных, қала тұрғыны:

-  Бұл табандылықты, шыдамдылықты қажет етеді. Көлемі шағын болғанымен, бір ғана макетті жасау үшін қаншама уақыт керек.  Әуелі хобби ретінде бастаған, қазір шығармашылық деңгейі өсіп, өзінің жеке стилі қалыптасып келеді. Бұдан бөлек Валерия тоқыма және сурет өнеріне қызығады.

Валерия алдағы уақытта қаладағы мәдени нысандардың макетін құрастыруды жоспарлап отыр. Бірінші кезекте қалалық музей мен өзі оқитын мектептің көшірмесін жасамақ. 

Авторлары: Елдос Кәкенов, Наталья Волкова, Куаныш Казбеков