Сырт мемлекеттерге 80 мың тоннадан астам ет жөнелтілді

Елде ет, сүт, құс өнімдерінің өндірісі артты, деп хабарлайды 24KZ. Енді бұл өнімдердің импортын азайтуға күш саламыз. Осы орайда «Инвестицияға тапсырыс» мемлекеттік бағдарламасы жүзеге аса бастады. Яғни ішкі нарықта сұранысы жоғары, ал импорттағы үлесі көп тауарларды өзімізде өндіруді көздейтін жобаларға қолдау көрсетіледі. Сөйтіп, экономиканың нақты секторын дамытуға басымдық беріледі.

Елде ет, сүт өнімдері көбейді

Отандық өндірушілер ет, сүт, құс өнімдерін көптеп ұсына бастады. Экономикалық зерттеулер институтының есебіне сүйенсек, құс және мал етін тірі салмақта сою көлемі 3% артқан. Ал сиыр басының көбеюі, сүт өндірісін 5% еселеді. Құс шаруашылығы да кенже қалған жоқ. Жұмыртқа кейінгі кезде 1,5% көп өндірілген. Демек жергілікті өнім ұсынысы артып жатыр. Тапшылық тәуекелі төмендеп келеді. Мамандар мұндай өзгерістердің баға тұрақтылығына да оң әсер ететінін айтады.

Ет экспорты артты

Иә, биыл мал шаруашылығы шамамен 3,5% өскен. Ет өндірушілер де қызу жұмыс істеп жатыр. Экспорт та еселенді. Жыл басталғалы сырт мемлекеттерге 80 мың тоннадан астам жаңа сойылған және қатырылған ет жөнелтілді. Бұл былтырғыдан 21 тоннаға көп. Экспорттық еттің жалпы құны 194 млн доллардан асады. Оның көбі Өзбекстанға сатылды. Яғни 137 млн долларға 50 мың тоннаға жуық ет жібердік. Бұл тізімді Ресей жалғайды. Көршілеріміз 24 млн долларға 13 мың тоннадан аса ет алды. Үштікті Қырғызстан түйіндейді. Бұл елге 12 мың тоннаға жуық ет жөнелттік.

«Инвестицияға тапсырыс» бағдарламасы іске асады

Елде сұранысқа ие бағыттарға инвестиция тарту жолға қойылды. Бұл қадам негізгі өнімдердің ішкі тапшылығын жойып, экспорттық өндірістерді нығайтуға мүмкіндік береді. Ауыл шаруашылығы министрі: «осылайша өңірлердің де тұрақты экономикалық өсуін қамтамасыз етуге болады», – дейді. «Инвестицияға тапсырыс» бағдарламасы аясында мемлекет импортты алмастыру және экспорттық әлеуеті жоғары салаларды анықтаса, өңірлер нақты жобалар жасап, оларды жүзеге асыруға дайын бизнес-бастамаларды ұсынады. Оның тиімділігі мен қаржылық және өндірістік мүмкіндіктерін «Бәйтерек» холдингі пысықтайды. Агроөнеркәсіп кешеніне қатысты жобалар тізімі жасақталды. Негізінен сүт фермаларын салу, ет және құс шаруашылығын дамыту, астықты терең өңдеу, жылыжай кешендерін құру және қант өнеркәсібін дамытуға көңіл бөлінеді.

Айдарбек Сапаров, ҚР Ауыл шаруашылығы министрі:

- Әрбір жоба ерекше бақылауда. Олардың табысты жүзеге асуына министрлік  жан-жақты қолдау көрсетеді. Біз аймақтармен және бизнес саласымен жұмысты күшейтуді үздіксіз жалғастырамыз, әрбір жобаның қаржылық тұрақтылығы, технологиялық негізділігі және ел экономикасы үшін барынша тиімділігі қамтамасыз етілуі тиіс.

Экономист: өңделген өнімді арттыру керек

Экономист Раушан Доламбаева: «жалпы ішкі өнімдегі өңделген өнімдердердің үлесін арттыру қажет», – дейді. Биылғы 10 айда ел экономикасы 6,4% артты.

Раушан Доламбаева, ҚР Президенті жанындағы Мемлекеттік басқару академиясы Басқару институтының профессоры:

- Біздегі жалпы ішкі өнімдегі өңделген өнімдердің үлесі аз ғана. Осы саланы дамыту үшін бізге драйверлер қажет. Ірі өндіріс ошақтарын ашу керек. Біздің елде барлық мүмкіндік, қаражат, ақпарат осындай ірі өндіруші компанияға бағытталатыны белгілі. Әзір дайын өнімдер саласында даму кемшін болып тұр. Сол себепті осы бағыттағы жұмысты жүйелеу керек.