Таразда автобус паркі жаңартылып жатыр

Таразда соңғы 3 жылда қоғамдық көлік паркінің 85 проценті жаңартылды. Бүгін қалаға  тағы су жаңа 24 автобус жеткізілді.

Олар қала аумағына жаңадан қосылған тұрғын  үй  алабтарына қатынайды. Жыл соңына дейін тағы 60 автобус алу жоспарда бар.

Жыл басынан бері Таразға  71 жаңа автобус жеткізілді. Соның 24-і бүгін жүргізушілерге табысталды. Заманауи қоғамдық көлікке 90 жолаушыға  дейін сияды. Автобустар пандус , кондиционер және бейне бақылау камераларымен жабдықталған.

Бақыт Берікбаев, автобус жүргізушісі:

- 9 бейнебақылауы бар. Барлығы бақыланып отырады. Магнитафон қойылған. Аялдамаларды микрафонмен хабарлап отыруға болады. Халыққа ыңғайлы автобус.

«Облыс орталығындағы 492 автобус, 45 бағытта қатынайды. Ал бүгін қолданысқа берілген қоғамдық көліктер, қалаға жаңадан қосылған  14 елдімекеннің тұрғындарына қызмет көрсетеді. Жаңа бағыттар сызбасын дайындау кезінде  жұртшылықтың  өтініші ескерілген. Көліктер оқу орындары мен емхана, сауда орталықтары мен облыстық ауруханалар сынды әлеуметтік нысандарға барады», - дейді қала әкімі.

Бақытжан Орынбек, Тараз қаласының әкімі:

- Барлығы 5 маршрут ашу жоспарымызда бар. Оның ішінде 2 маршрутты жыл басында ашсақ, бүгін қосымша тағы да екі маршрут ашылып отыр. Сарыкемер елді мекенімен байланыстыратын 50-маршрут. Бұл жаңа маршрут қада аумағына жаңадан қосылған Бұрыл және Қызыл жұлдыз алабтарын қоғамдық көлікпен қамтамасыз етеді.

Биыл жол ақысын субсидиялап, автобус парктерін жаңартуға қала бюджетінен 7 млрд теңге бөлінді. Мемлекеттік қолдау арқасында автопарктер автобустарын толықтай жаңартып жатыр.

Әділет Шерімов, автобус паркінің директоры:

- 2022 жылдан бері 90 автобус алып келген болатынбыз. Енді міне, қазір 24 автобус алып жатырмыз. Келесі апта тағы 10 автобус келе жатыр.

«Тасымалдаушы компаниялар жыл соңына дейін тағы 60 жаңа автобус алады. Соның есебінен шаһардағы қоғамдық көліктерді 100 пайыз жаңартуды жоспарлап отырмыз», - дейді қала басшысы.

Авторлары: Мерей Бает Бақытжан Бапаев Елдар Байділдә