Тарихи есімдер жаңғыруда

Шымкентте нәрестелерге есім беруде жаңа үрдіс қалыптасып келеді. Кейінгі кезде ата-аналар балаларына тарихи тұлғалардың атын қоюға ден қоя бастаған.

Негізі дүние есігін ашып, өмір табалдырығын енді аттаған нәрестеге жа­ра­сымды, айшықты ат беру  бағзыдан келе жатқан үрдіс. Қазір перзентханаларда тарихи тұлғалардың есімін иеленген сәби көп. Керей мен Жәнібек, Тәуке мен Томирис секілді есімдерді қою сәнге айналды.

Дана Байжомартова, қалалық «Азаматтарға арналған үкімет» АХАТ басқармасы басшысының міндетін атқарушы:

- Керей хан, Тәуке хан, Қасым хан, Абылай хан деген балалардың есімі қойылып жатыр. Ерекше есімдер жылдың соңында балаға Нартұлға, Байкен деген есімдер қойылып жатыр. Томирис есімі әлі де қойылып жатыр. Ата-аналар Томиристей мықты болсын деп, тарихи есімдерді де әрине қойып жатыр.

Бұл – бірнеше күн бұрын дүние есігін ашқан Әлихан есімді батыр. Әжесі немересінің атын «Әлихан Бөкейхан секілді елінің қажетіне жарайтын азамат боп өссін» деген тілекпен қойған.

Айнұр Пердеқұл, қала тұрғыны:

- Апасы есімін Әлихан деп қойды. Әлихан Бөкейханов сияқты халқын сүйетін, еліне қызмет ететін, сондай мықты тұлға болсын деді. Біз сол кісі сияқты Тәуелсіздікке өз үлесін қосатын, халқын сүйетін, еліне қызмет ететін үлкен азаматтардың бірі болсын деп тілейміз.

«Былтыр қалада 7 мыңнан аса неке тіркеліп, 27 мыңға жуық сәби дүниеге келген. Мегаполисте туу көрсеткіші артқан. Сонымен қатар, денсаулық сақтау саласы да қарқынды дамып келеді»,- дейді мамандар.

Гүлбану Сыздықова, қалалық Перинаталдық орталықтың бас дәрігері:

 - Қазір салмағы 600 грамм болып туған сәбилерді де аман алып қалуға мүмкіндік бар. Ал 700-800 грамм, 1 келі салмақта дүниеге келген нәрестелерді біздегі дәрігерлер толықтай күтіп-бағуды меңгерді. Жергілікті бюджет есебінен мамандардың біліктілігін арттыру жұмыстары жүргізіледі. Неонатологтар, гинекологтар мен реаниматологтар ТМД елдерінде, Литвада және Мәскеуде білімін жетілдіріп келді.

Адамның есімі оның болашағына да әсер етеді,- дейді мамандар. Расында тарихи тұлғалардың есімін беруде терең маңына, ата-ананың арманы жатыр. Олар осы бөбектердің арасынан болашақ көшбасшысы, ғалым, әнші мен күйші шығатынына сенеді.

Авторлары: Асланбек Шығыр, Катерина Попкова, Нұрмахан Бекмұратов, Нұрмахан Мусатов