Тасқын қаупі: Жайық жағасы бекітіліп жатыр

Qazaq24.com, 24.KZ дереккөзінен алынған ақпаратқа сүйене отырып жаңалық таратты..

Атырау облысының Махамбет ауданында тасқыннан қауіп төнген елді мекендерді қорғау шаралары жалғасып жатыр, деп хабарлайды 24KZ. Биыл көктемде арнасынан асқан Жайық өзені бірнеше ауылға қатер төндіргеннен кейін өңірде шұғыл инженерлік жұмыс қолға алынды. Қазір ауданға қарасты екі ауылда жағалауды нығайту жұмысы жүріп жатыр. Мамандардың айтуынша, кезекте тағы үш ауылдық округ бар. Махамбет ауылының тұсындағы Жайық жағасының 4,7 шақырымы бекітіледі. Жоба қараша айының соңына дейін толық аяқталуы тиіс. Ауқымды құрылысқа жалпы 33 млрд теңге қажет. Бүгінге дейін оның 17 млрд теңгесі игерілді.

Махамбет селосын тасқыннан қорғауға арналған ұзындығы 5 шақырымға жуық жаға бекіту жұмысы 90% аяқталған. Енді жағалауды абаттандырып, жаяу жүргіншілер жолы мен жарық шамдар орнатылып жатыр. Құны 17 млрд-тық жоба жыл аяғына дейін мәреге жетуі тиіс.

Сергей Пак, мердігер мекеменің өкілі:

- Жаға бекітуге осы заманғы ең озық технология мен материалдарды қолданып жатырмыз. Габиондық материалдың биіктігі 7 метр. Ол суға да, сыртқы әсерге де төзімді. Бөгет жер деңгейімен теңестірілгенде жағалау толықтай абаттандырылады.

Соңғы 15 жылда Жайық өзені арнасын оңтүстіктен терістікке қарай 70 метрге дейін өзгерткен. Салдарынан ондаған ауылға қауіп төнді. Әсіресе 2024 жылы осы Махамбет ауданында көптеген ауыл су қоршауында қалған болатын.

2024 жылы жоғарыдан аққан Жайық өзені Махамбет ауданының тұсында 9 метрге дейін көтерілген болатын. Ауданға қарасты 11 ауылдық округті су қоршады. 30 жылға жуық судан қауіп күтпей келген өңір әбігерге түсті. Әсіресе аудан орталығы Махамбет селосы мен Алға ауылы көптің күшімен аман қалған еді. Сонан кейін барлық елді мекенде бөгет салу жұмыстары басталды.

Асылхан Шакимов, аудандық ТКШ бөлімінің басшысы:

- Қазіргі таңда ең негізгі деп ең қауіп төндірген осы Махамбет пен Алға ауылының жаға бекіту жұмыстары жүріп жатыр. Ал болашақта негізінен қауіпті деген Талдыкөл ауылы және Есбол ауылының жобалау сметалық құжаттамалары дайын тұр. Талдыкөл ауылына конкурс ұйымдастырып, мердігер мекемені анықтап қойдық.

Келесі жылы жоба бойынша 16 млрд теңгеге Жайық өзені бойындағы тағы 3 ауылда бөгет тұрғызу жұмыстары жалғасады. Себебі тілсіз жаудың қашан тап берерін күтсек, өзен бойындағы 32 мыңнан астам тұрғыны бар 11 ауыл қорқынышпен күн кешері анық.

Авторлары: Арыстанбек Кенже, Айбек Байзақов, Жандос Рахметуллин

Қосымша ақпарат пен соңғы жаңалықтар үшін Qazaq24.com сайтын бақылаңыз.