Теледидар алдындағы әрбір екі сағат семіздік қаупін тудырады

NewAtlas сайтында жарияланған талдау материалына сүйенген Aikyn.kz какаоның офистік қызметкерлерге қалай пайдалы болатынын түсіндіреді.

«Офистік өмір салты» денсаулыққа зиянды әсері үшін  «жаңаша темекі шегу» деп аталады. Ағылшын зерттеушілерінің айтуынша, алғаш рет какао құрамындағы флаванолдар қан тамырларына зиянды әсерді тежеу қабілетіне ие екені дәлелденді.

Бүгінде адамдар бұрынғыдан да көп уақытын отырып өткізеді. Бұндай жағдайдың теріс салдары барған сайын айқын байқалуда. Мысалы, бір зерттеу теледидар алдында өткізген әрбір екі сағат семіздік қаупін 23%-ға, қант диабеті қаупін 14%-ға арттыратынын көрсеткен.

Тағы бір зерттеу қозғалыссыз отырып жұмыс істегенде әр сағат бұлшықет массасы мен күшін жоғалтумен сипатталатын саркопения ауруының даму ықтималдығын 33%-ға арттыратынын анықтаған. Сондай-ақ, ұзақ отыру мойын, арқа және иық ауруларын тудыруы мүмкін екені де бірнеше зерттеулерде дәлелденген.

Демек, ұзақ отыру денсаулыққа көп зиян тигізеді. Алайда жаңа зерттеу кеңсе қызметкерлері мен Netflix жанкүйерлеріне үміт сыйлайды. Үміт – какао түрінде келді.

Отырып жұмыс істеудің зиянды болуының негізгі себебі – қан айналым жүйесінің жұмысын шектейді. Қан тамырларының жұмысы сәл ғана бұзылса да, инфаркт пен инсульт сияқты ауыр аурулардың қаупі өседі.

Алдыңғы зерттеулер флаванол деп аталатын қосылыстардың жүрек-қантамыр жүйесін қорғай алатынын көрсеткен. Сондықтан Бирмингем университетінің (Ұлыбритания) ғалымдары флаванолдар отырған кезде қан тамырларының жұмысын тікелей жақсарта ала ма деген сұраққа жауап іздеген.

Қымбат тағамдарды тұтыну мәдениеті туралы мына әзіл видеода:

Зерттеуге 18 бен 45 жас аралығындағы 40 дені сау ер адам іріктеледі. Тыныс алу көлемінің ең жоғары деңгейін (VO₂max) өлшегеннен кейін қатысушылар екі топқа бөлінді. 20 адам – жоғары дайындықтағы, ал қалған 20 – төмен дайындықтағы деп бағаланды.

Содан кейін әр топ екіге бөлінді. Бірінші топ какаоның флаванолдарға бай сусынын (695 мг флаванол), ал екінші топ флаванол мөлшері аз (5,6 мг) какаоны ішкен. Кейін барлығы екі сағат бойы отырып жұмыс істеген.

Зерттеушілер қан тамырларының жұмысын бағалау үшін иық аймағындағы қан ағымының тәуелді кеңеюі (FMD) әдісін қолданды. Нәтижесінде, жоғары да, төмен де дайындықтағы қатысушылардың флаванолға бай какао ішкен топтарында қан тамырларының кеңею көрсеткіштері төмендемеген. Ал флаванол мөлшері аз сусын ішкендердің қол және аяқ артерияларында FMD төмендеп, қан қысымы көтеріліп, қан ағымы нашарлаған, бұлшықетке оттегі жеткізілу азайған.

Зерттеу авторы Сэм Лукас былай дейді: «Біздің тәжірибеміз көрсеткендей, тек флаванолы аз какао ішкенде отыру салдарынан қан тамырларының қызметі уақытша бұзылуы мүмкін. Ал флаванолдарға бай какао ішкендердің FMD көрсеткіші екі сағаттық отырыстан кейін де өзгеріссіз қалды».

Зерттеу авторлары бұл флаванолдың артерияларды қорғайтын әсері адамның физикалық дайындық деңгейіне тәуелсіз екенінің дәлелі екенін айтады.Егер какао дәмі ұнамайтын болса, флаванолды басқа тағамдардан да алуға болады. Алма, өрік, жидектер, жаңғақтар, сондай-ақ жасыл және қара шай – флаванолға бай көздер. Сонымен қатар, қызыл шарап, қырыққабат, қызанақ пен шабдалда да флаванол жақсы мөлшерде бар.

Зерттеу авторы Катарина Рендейру былай деп қорытындылайды: «Қазіргі қоғамда офистік өмір салты кең тараған. Оның қан тамырларына тигізетін қаупі жоғары. Сондықтан, флаванолға бай өнімдер мен сусындарды тұтыну – денсаулықты ұзақ мерзімде сақтаудың тиімді тәсілі бола алады. Әсіресе, мұндай тағамды қысқа серуен не орнынан тұрып кеңсе ішінде жүру сияқты белсенді үзілістермен үйлестіру пайдалы».

Бір ескерту. Какао ұнтағы екі түрлі болады: сacao және сocoa. Біріншісі, қуырылмаған какао бұршақтары. Олардың құрамында барлық пайдалы қоректік заттары мен пайдалы қосылыстар сақталған. Ал екіншісі – қуырылған (өңделген) какао бұршақтары. Олардан какао ұнтағы жасалады. Оның құрамында қуырылмаған шикі какаоның құрамындағы пайдалы заттардың 90%-ы жойылады.

Он бес грамм (шамамен екі ас қасық) шикі какао ұнтағында 400 мг-нан астам флавоноидтар бар. Сондай 15 грамм қуырылған какао ұнтағында тек 78 мг болады. Сондықтан қуырылмаған шикі какао қолданған әлдеқайда пайдалы.

Зерттеу нәтижелері Journal of Physiology журналында жарияланды.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.