Тоқаев Армения премьер министрімен қандай келісімге келгенін айтты

АСТАНА, 21 қараша – Sputnik. Қасым-Жомарт Тоқаев пен Никол Пашинян Ақордада өткен келіссөздерді қорытындылады, деп хабарлайды Sputnik Қазақстан тілшісі.

Жақында Арменияға Қазақстан бидайының алғашқы 1 мың тоннасы жеткізілді.

"Бұл бастаманың саяси және экономикалық мән-маңызы айрықша. Біз Арменияға жоғары сапалы астық өнімдерін және басқа да тауарларды тұрақты түрде жеткізуге дайынбыз Осы бағыттағы жұмысқа күш-жігерімізді жұмылдыруға уағдаластық. Екі ел арасында тікелей әуе рейсін ашу және әуемен жүк тасымалдау жұмысын ретке келтіру – маңызды міндеттің бірі", – деді Тоқаев.

Президенттің айтуынша, өзара сауда айналымын ұлғайту үшін Қазақстан армян нарығына жалпы құны 350 миллион доллар болатын тауар ұсына алады.

"Сондай-ақ біз Арменияның экспорттық әлеуетін қолдауға ниет білдірдік. Оған қоса, инвестициялық жобаларды жүзеге асырудың маңыздылығын атап өттік. Кәсіпкерлер арасындағы байланысты нығайтатын нақты қадамдарды қолға алуға келістік. Жаңадан құрылған Қазақстан – Армения іскерлік кеңесі екі ел бизнес өкілдерінің басын қосып, екі жаққа да тиімді жобаларды жүзеге асыруға тиіс", – деп атап көрсетті мемлекет басшысы.

Тоқаев пен Пашинян келіскен басқа да мәселелер:

жасанды интеллект, жаңа технология және цифрландыру бойынша тәжірибе алмасу;

келесі жылы Alem.ai негізінде Арменияның TUMO Astana халықаралық білім беру орталығы ашу;

алдағы жылдары Қазақстанның Армениядағы, Арменияның Қазақстандағы медицина күндерін өткізу.

Келіссөздер кезінде өнеркәсіп, көлік-логистика, энергетика, ауыл шаруашылығы, цифрландыру, құрылыс және басқа да салалардағы серіктестікті дамыту жайы да талқыланды. Қазақстан Арменияның көлік-транзит саласындағы "Бейбітшілік қиылысы" бастамасын қолдайды.

"Сондай-ақ біз "TRIPP халықаралық бейбітшілік пен өркендеу жолы" жобасына қатысуға қызығушылық танытып отырғанымызды растаймыз. Осы стратегиялық дәліздерді Транскаспий халықаралық көлік бағдарымен және Солтүстік-Оңтүстік дәлізімен ұштастыру екі елдің де мүддесіне сай келеді", – деді Тоқаев.