Тоқаев келесі жылы Балқаш АЭС құрылысын бастауды ұсынды

Президент Қасым-Жомарт Тоқаев келесі жылы "Балқаш" АЭС құрылысын бастауды ұсынды. Бұл туралы Мемлекет басшысы Қазақстан халқына Жолдауында мәлімдеді, деп хабарлайды Tengrinews.kz тілшісі.

"Келесі жылы "Балқаш" АЭС-тің құрылысын бастауды қолға алуға болады, тіпті бұл қажет деп санаймын. Сондай-ақ, "Мойынқұм" АЭС-тің құрылысын мүмкіндігінше тезірек бастау мақсатында кешенді ынтымақтастық туралы келісімге қол қою керек", - деді Президент.

Мемлекет басшысы келіссөздер барысында Қазақстанның ұлттық мүддесі ескерілуге тиіс екенін айтты.

Президенттің сөзінше, 2029 жылға қарай Қазақстан тұрақты энергия профицитіне қол жеткізуге тиіс. Ол үшін жаңа электр станциялары мен электр беру желілерін салып, қолданыстағыларын жаңғырту, таза көмір генерациясын және жаңартылатын энергетиканы, ең алдымен күн энергиясын дамыту қажет екенін мәлімдеді.

Сондай-ақ, Үкіметке еліміздің 2035 жылға дейінгі бірыңғай ұзақ мерзімді энергетикалық теңгерімін жасақтау тапсырылды.

Тоқаев болашақ АЭС-терді уран шикізатымен қамтамасыз ету мәселесіне жеке тоқталды. Президент мемлекеттік стратегиялық уран резервін құруды қарастыруды ұсынды, бұл қазақстандық атом станцияларының қажетін алдағы ғасырға дейін қамтамасыз етуге мүмкіндік береді.

"Оларды уран шикізатымен, айталық, 50 жылдан кейін және одан әрі қалай қамтамасыз ететінімізді қазірден бастап ойластыру керек. Мемлекеттік стратегиялық уран резервін құру туралы ұсынысты байыпты қарастыруы қажет санаймын", - деді Президент.

Тоқаев Қазақстанда жоғары технологиялық өндірістер ашуға, атом энергетикасы саласында құзыретті беруге және отандық мамандарды даярлауға шетелдік серіктестерді тартуға шақырды. Президенттің айтуынша, мұндай ұсыныстар Ресей мен Қытай компанияларынан түсіп жатыр.

Алғашқы АЭС құрылысы 2024 жылғы 6 қазанда өткен референдумда қолдау тапты: оған қатысушылардың 70 пайыздан астамы дауыс берді.

2026 жылғы қыркүйекте қазақстандық тарап "Росатом" құрылымына кіретін компаниямен "Балқаш" станциясын жобалау, жабдықтарды жеткізу және салу туралы келісімшартқа қол қойды. Екінші АЭС-тің уақытша атауы - "Мойынқұм".

Бұған дейін оны Алматы облысы Жамбыл ауданында орналастыру жоспарланғаны хабарланды.

Бізді Google-дың негізгі дереккөздер тізіміне қосыңыз