Трамп Иран жақын күндері қатты зардап шегеді деп мәлімдеді

АҚШ президенті Дональд Трамп Иран дүйсенбі және сейсенбі күндері үлкен соққы астында қалатынын мәлімдеді. Бұл туралы ол радиожүргізуші Хью Хьюитке берген тікелей эфирдегі сұхбатында айтты, деп хабарлайды Tengrinews.kz.

Трамп Иранның қазіргі басшылығының көзін жою мүмкіндігін де жоққа шығармады.

"Бүгін түнде біз оларға өте қатты соққы жасаймыз және ертең де оларды аямаймыз. Олар бұған ештеңе істей алмайды", - деді ол.

Трамп АҚШ-тың "Пикакс-Маунтинді жоюға дайындалып жатқанын" айтып, "ирандықтарға дайын болуды ескертіңіздер" деп қосты.

Анықтама: Ирандағы қатты зақымдалған Натанз уран байыту зауытына жақын орналасқан Пикакс тауы - жақсы бекітілген нысан. Онда тереңде жатқан екі туннель кешені бар, сарапшылардың пікірінше, олар АҚШ арсеналындағы ең қуатты бункерге қарсы бомбалардың да қауқары жетпейтін тереңдікте орналасқан.

"Біз (Пикакс тауын - ред. еск.) мұқият бақылап отырмыз. Ол жерде ешқандай белсенділік көріп тұрған жоқпыз. Олардың ядролық жағдайы мәз емес. Бұл туралы естіген сайын оны жарып жібереміз. Сондықтан олар бұл туралы айтқанды ұнатпайды. Бірақ жақын арада Пикаксқа мүмкіндік беретін шығармыз", - деді Трамп.

Трамптан АҚШ пен Иран арасында қол қойылған өзара түсіністік туралы меморандум туралы сұралды. Америкалық көшбасшы бұл бастапқыда тексеру болғанын, бірақ Тегеран соңында бұл сынақтан өте алмағанын айтты.

"Ол тексеру үшін жасалған еді. Бұл сынақ болатын.... Тыңдаңыздар, оңбағандармен істес болғанда өзара түсіністік туралы меморандумның маңызы шамалы. Сондай-ақ лайықты адамдармен жұмыс істегенде де оның маңызы көп емес, өйткені бұл жай ғана түсіністік меморандумы. Оның үлкен салмағы жоқ. Мен: "Біз мұны не үшін істеп жатырмыз?" дедім. Білесіз бе, АҚШ-та алдымен меморандум жасап, содан кейін келісімге көшу - стандартты тактика", - деді Трамп.

Бұған дейін президент Дональд Трамп АҚШ Иранға қарсы әскери-теңіз блокадасын қайта жаңғыртып, Ормуз бұғазы арқылы тасымалданатын барлық жүкке 20 пайыздық баж салығын енгізетінін мәлімдеген болатын. Иранның жоғарғы біріккен әскери қолбасшылығы АҚШ-қа бұғазды басқаруға араласуға рұқсат берілмейтінін, ал БҰҰ-ның кеме қатынасы жөніндегі агенттігі мәлімдеме жасап, бұғаздан өтуге міндетті баж салығын енгізуге ешқандай құқықтық негіз жоқ екенін айтты.

Google News арқылы жаңалықтарымызды қадағалаңыз