Туристік компания 200 адамды алдаған қылмыстық іс қозғалды

АСТАНА, 18 шілде – Sputnik. Ақтөбе облысында туристік компанияға қатысты алаяқтық фактісі бойынша тергеу басталды, деп хабарлайды Sputnik Қазақстан.

Компания өкілдері 200-ден астам азаматқа шетелге демалыс ұйымдастырып береміз деп уәде беріп, әр клиенттен ақша алған. Алайда жолдамаларды рәсімдеу, қонақүйлерді брондау және әуе билеттерін сатып алу бойынша алдын ала төленген қызметтер көрсетілмеген. Соның салдарынан жүздеген адамның жазғы демалысы жоспарланғандай өтпей қалды.

Осы факті бойынша сотқа дейінгі тергеу басталды. Қазіргі уақытта оқиғаның барлық мән-жайы мен келтірілген материалдық шығын көлемі анықталып жатыр.

Полиция туристік компаниялардың атын жамылған алаяқтардың жаз мезгілінде белсенді болатынын ескертеді. Олар нарықтағы бағадан едәуір төмен турларды ұсынып, шұғыл төлем жасауды талап етеді. Ақшаны алғаннан кейін байланысқа шықпай қояды.

Осыған байланысты туристік қызмет үшін төлем жасамас бұрын компанияның құжаттарын, клиенттердің пікірлерін мұқият тексеріп, міндетті түрде ресми келісімшарт жасасқаннан кейін ғана қаражатты расталған деректемелер арқылы аудару қажет.