Turkistan Book Fair 2025 : Түркі тілдес елдердің әдеби қауым өкілдерін тоғыстыратын халықаралық кітап көрме жәрмеңкесі өтеді

Түркістан қаласында түркі тілдес елдердің баспа ұйымдарын, қаламгерлерін, аудармашыларын, әдеби қауым өкілдерін тоғыстыратын халықаралық кітап көрме-жәрмеңкесі өтеді, – деп хабарлайды  Aikyn.kz.

Осыған байланысты облыс әкімінің орынбасары Ертай Алтаев ақын, ҚР Еңбек сіңірген қайраткері, «Фолиант» баспасы директорының кеңесшісі Дәулеткерей Кәпұлын және «Фолиант» баспасының директор орынбасары Гүлнәр Саржанованы қабылдады. Кездесу барысында ауқымды шараға дайындық барысы жан-жақты талқыланып, атқарылатын жұмыстар пысықталды.

Облыс әкімінің орынбасары Мемлекет басшысы Қасым-Жомарт Тоқаевтың Ұлттық құрылтайда айтқан кітап оқу мәдениетін дамыту жөніндегі бастамасына тоқталып, көрмені жоғары деңгейде ұйымдастыруды тапсырды.

Президент өз сөзінде: «Кітапқұмарлық – жақсы қасиет. Мысалы, көптеген мемлекет Ұлттық кітап күнін атап өтеді. Мен Ұлттық кітап күнін белгілеу туралы ұсынысты қолдаймын. Бірақ оны мазмұнды етіп өткізу қажет.

Мысалы, түрлі іс-шаралар ұйымдастырып, арнайы жәрмеңкелер өткізу қажет. Шын мәнінде, озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда барынша орнықтыруымыз керек» деп атап өткен болатын. Осы орайда ұйымдастырылатын шараны жоғары деңгейде ұйымдастырылуы тиіс, – деген Ертай Кенжебекұлы жауаптыларға нақты тапсырмалар беріп, міндеттер жүктеді.

«Turkistan Book Fair – 2025» көрме-жәрмеңкесіне 50-ге жуық компания қатысады деп күтілуде. Олардың арасында Түркия, Өзбекстан, Моңғолия, Әзербайжан, Қырғызстан, Саха Республикасы (Якутия), Ресей, Қазақстан сынды елдер бар.

Халықаралық кітап көрме-жәрмеңкесін өткізудің басты мақсаты – балалар мен жасөспірімдерді кітап оқуға баулу, отбасымен бірге кітап оқуды насихаттау, оқырман талғамын қалыптастыру, – деді Дәулеткерей Кәпұлы.

«Фолиант» баспасының директор орынбасары Гүлнәр Саржанованың айтуынша, «Turkestan Book Fair» кітап көрме-жәрмеңкесі үш күндік мәдени-іскерлік бағдарламадан тұрады. Көрме аясында жаңа кітаптардың тұсаукесерлері, автормен кездесу, автограф-сессиялар, балалар алаңында арнайы шеберлік сағаттары өткізіледі. Аталған іс-шара аясында түркі тілдес елдердің баспаларының кітаптарына арналған арнайы экспозиция ұйымдастырылады. Кітап жәрмеңкесінде келушілер баспа бағасы бойынша кітап сатып алу мүмкіндігіне ие болады.

«Turkestan Book Fair» түркі әлемінің рухани және мәдени байланысын нығайтуға, түркі елдерінің әдеби мұрасын кеңінен танытуға, баспагерлер авторлар мен мәдени ұйымдар арасында ынтымақтастық алаңын құруға бағытталған.

Айта кетсек, көрме-жәрмеңке кітапсүйер қауым үшін 26 қараша сағат 10:00-де ашылады, ал ресми ашылу салтанаты сағат 11:00-де «Конгресс Холл» фойесінде өтеді. Игі шараның ұйымдастырушысы – Түркістан облысы әкімдігінің қолдауымен «Фолиант» баспасы және ТҮРКСОЙ халықаралық ұйымы.