Түркістан қаласында 500 орындық тергеу изоляторын салу мәселесі пысықталды

Облыс әкімдігі баспасөз қызметінің мәліметінше, жиын барысында Түркістан облысы ҚАЖ департаментінің әкімшілік ғимаратының жай-күйі, Түркістан қаласында 500 орындық тергеу изоляторы мен 50 орындық арнайы қабылдағыш салу, бейнебақылау жүйесін орнату, № 55 мекеменің қауіпсіздік инфрақұрылымы, мектеп пен колледж ғимараттарын теңгерімге өткізу, өндірістік қызметті дамыту, № 55 мекеменің әкімшілік ғимаратын жөндеу және пробация қызметін материалдық-техникалық тұрғыда жабдықтау мәселелері сөз болды.

Мәжілісте облыс әкімінің бірінші орынбасары Зұлпыхар Сансызбайұлы нақты тапсырмалар берді.

— Пробация есебінде тұрған азаматтар үшін сұранысқа ие мамандықтар бойынша жұмыс орындарын көбейту қажет. Сонымен қатар Президент Әкімшілігі басшысының 2025 жылғы 20 қазандағы ҚАЖ жүйесіне қатысты хаттамалық тапсырмаларын орындау мақсатында Шымкент қаласы және Түркістан облысы бойынша ҚАЖ департаменті мен әкімдік басқармалары бірлесе жұмыс жүргізуі тиіс. Барлық тапсырма белгіленген мерзімде орындалуы қажет. Облыс аумағында пробация үйлерін ашу мәселесі пысықталып, іске асырылуы қамтамасыз етілсін, — деді ол.

Жиын қорытындысында саладағы кемшіліктерді жою бойынша жауапты мекемелерге нақты тапсырмалар жүктелді.

Бұдан бұрын Түркістан облысындағы атыстан бір адам қаза тауып, үш адам ауруханаға жеткізілгенін жазған едік.