Ұлттық бірегейліктің тірегі: Қобыздың халықаралық деңгейде мойындалуы

Ұлттық бірегейлікті сақтау тек демографияны өсіру немесе шекараны кеңейту, не болмаса сақтаумен шектеліп, есептелмейді. Әсіресе қазіргі ұлттар мен ұлыстар, мемлекеттер мен аймақтар араласып, айқасып, бір біріне сіңісіп кетіп жатқан жаһандану заманында ұлттық бірегейлікті сақтап қалу қиынның қияметі. Осы тұста мемлекет болып идеологиялық жұмыстар жүргізу, мәдени құндылықтарды жаңғыртып, халықаралық мұралар тізіміне енгізіп, бекіту маңызды.

Осы ретте естеріңізге сала кетейік, өткен желтоқсанда өзіміздің қобыз бен киіз үй ЮНЕСКО-ның мәдени мұраларының қатарына енгізілгені жарияланған. 

Бұл еліміз үшін жай ғана мәдени шара емес, стратегиялық маңызды оқиға. Себебі қазақ мәдениеті халықаралық деңгейде мойындалуы ұлттық бірегейлікті бекіте түседі. Тайға таңба басқандай тарихқа жазылып, сақталады деген сөз. 

ЮНЕСКО тізіміне ену – мәдени нысанның сақталуына, зерттелуіне, насихатталуына арнайы қаржыландыру, ұрпаққа аманат етіп қалдыру мен қорғалуы деген сөз.

Мысалы қобызды алып қарастырайық. Ол туризмге түрткі, мәдени дипломатия құралы, ұлттық бренд бола алады.

“Қобыз адам баласы жаратылғанда қоса пайда болды” деген аңыз болса, Қорқыт атамыз туралы ауыз әдебиетінде қаншама дерек бар. Бұл қобызбен байланысты қазақ халқының терең философиясы, фольклоры, ауыз әдебиеті және тарихымен сабақтасып жатыр. Яғни қобыз қазақ халқының мәдени мұрасының қаншалықты тереңде жатқанын көрсетеді. 

Осы ретте Қазақстан Республикасы Мәдениет және ақпарат министрлігі тарапынан мәдени мұраларымызды ЮНЕСКО-ның материалдық емес мұралар тізіміне енгізуге  атсалысуы орынды шешім болып отыр.