Үндістанда қамаудағы Unity танкерінен алғашқы теңізшілер еліне оралады

Үндістанда ел жағалауында жарты жылға жуық уақыттан бері қамауда тұрған Unity мұнай танкерінің теңізшілерін елдеріне қайтару басталды.

Экипаждың жеті адамнан тұратын алғашқы тобы кемеден түсіп, отанына оралуға дайындалып жатыр. Алайда кемеде қалып қойған теңізшілердің арасында болған Қазақстан азаматы әзірге бортта қалуда. Бұл туралы ТАСС хабарлады.

Ресейдің Калькуттадағы бас консулдығының мәліметінше, 29 қазанда Unity танкерінен экипаждың алғашқы жеті мүшесі түсірілген. Олардың алтауы – Ресей азаматы, біреуі – Мысыр азаматы.

Теңізшілер кемеден түскеннен кейін Үндістанның Одиша штатының әкімшілік орталығы Бхубанешвар қаласына жеткізілген.

Олардың еліне ұшуы 31 қазанға жоспарланған.

Осылайша, бірнеше ай бойы қамауда тұрған кемеден шыға алмай келген экипаж мүшелерін елдеріне қайтару процесі ақыры басталды.

Қазақстан азаматы қашан оралады?

Танкер бортында барлығы 23 адам болған: 20 Ресей азаматы, екі мысырлық және бір қазақстандық.

Жеті теңізшіден тұратын алғашқы топтың құрамына Қазақстан азаматы кірмеген.

Үндістанның Парадип порты әкімшілігінің мәліметінше, қалған 16 экипаж мүшесін қараша айының бірінші жартысында елдеріне қайтару жоспарланып отыр.

Ол үшін кемені қабылдап алып, одан әрі қызмет көрсетуін қамтамасыз ете алатын жаңа экипаж жасақтау қажет.

Осылайша, Қазақстан азаматы репатриацияның келесі кезеңінде елге оралады деп күтілуде. Алайда нақты күні әзірге белгісіз.

Бұған дейін Қазақстан Сыртқы істер министрлігінің ресми өкілі Жанболат Үсенов қазақстандық дипломаттар отандасымыздың елге оралуына жәрдемдесуді сұрап, Үндістан тарапына дипломатиялық нота жолдағанын хабарлаған болатын.

Қамаудағы танкерде алты айға жуық уақыт

Камерун туы астында жүзетін Unity мұнай танкері 2026 жылғы 11 мамырдан бері Үндістанның Парадип порты маңындағы зәкір тұрағында тұр.

БАҚ мәліметінше, кеме жанармай жеткізушімен арадағы қаржылық дау салдарынан қамауға алынған.

Экипаж мүшелері өз елдеріне орала алмай, кемеде қалуға мәжбүр болған.

Теңізшілердің туыстары кемедегі жағдайдың қиындағанын, соның ішінде азық-түлік пен ауызсумен қамтамасыз ету мәселелері, байланыс үзілістері және техникалық ақаулар болғанын айтқан.

Жағдай ұзаққа созылып, дипломаттар мен Үндістанның сот органдарының араласуын қажет етті.

Үндістан соты теңізшілерді елдеріне қайтаруды міндеттеді

6 қазанда Одиша штатының Жоғарғы соты экипажды елдеріне қайтару үшін шұғыл шаралар қабылдауды міндеттеді.

Сот кеме иесі тарапынан қажетті қолдаусыз қалған теңізшілерді елге қайтаруды құзырлы органдарға тапсырды.

Сондай-ақ кеменің қараусыз қалмауы үшін экипажды ауыстыру туралы нұсқау берілді.

Репатриацияны ұйымдастыруға жұмсалған шығындар танкер иесінен өндіріп алынуы мүмкін.

Теңізшілердің туыстарының мәліметінше, кеме Bluetide Charters FZE компаниясына тиесілі.

29 қазанда басталған репатриация осы шаралардың алғашқы нақты нәтижесі болды.

Бүгін, 16:03