Вячеслав Кимнің жұбайы Англиядан 13,7 млрд теңгеге тарихи поместье сатып алды

Kaspi тобының тең иесі Вячеслав Кимнің жұбайы Татьяна Ким Англияның Суррей графтығында орналасқан Wishanger Manor атты тарихи поместьеге иелік етеді, деп хабарлады «Фонд-бюро расследования коррупции» телеграм-арнасы. 

Бұл мүлік 2021 жылы £20 млн (шамамен 13,7 млрд теңге) қаржыға сатып алынған. Сол жылы ол аймақтағы ең ірі мәміле болған. Бұдан бөлек, Татьяна Ким £1,6 млн (1 млрд теңгеден аса) тұратын қосымша үйді де алған.

Wishanger Manor – аймақтағы ең көне тарихи орындардың бірі. Алғаш рет 1167 жылы аталған. Жалпы аумағы 16 гектардан асады. Мұнда негізгі үй, күзет үйі, теннис корты, бассейн, тоған және орманды жерлер бар. Лондоннан шамамен 80 км, Хитроу әуежайынан 56 км қашықтықта орналасқан.

Поместьені қайта жөндеу жоспары жергілікті билік тарапынан сұрақтар туғызды. Әсіресе биоәртүрлілікті сақтау мәселесі, яғни құрылыс жұмыстары жарқанаттарға әсер етуі мүмкін деген күдік айтылды. Сонымен қатар, жаңа орнатылған 2,5 метрлік ағаш қоршауды да заңсыз деп тауып, оны алып тастауды талап етті. Кейін апелляциядан соң шешім жеңілдетіліп, қоршаудың биіктігін 1 метрге дейін қысқарту міндеттелді.

Соңғы үш жылда Вячеслав Кимнің байлығы үш еседен артық өсті: $2 млрд-тан $7,1 млрд-қа (3,6 трлн теңге). Бұл өсімнің басты себебі – Kaspi компаниясының NASDAQ биржасына шығуы.

2025 жылы Кимнің бақылауына тағы бір қаржы ұйымы өтті – бұрынғы Jusan Bank. Қазір ол Alatau City Bank деп аталады. Бұған дейін банк Назарбаев отбасының құрылымдарына тиесілі болған.

Ким отбасының Ұлыбританиядағы жылжымайтын мүлкі тек Суррейдегі поместьемен шектелмейді. Бұған дейін Татьяна Кимнің Лондондағы Мэйфэр ауданында жалпы құны £25,7 млн (17,6 млрд теңге) болатын екі пәтері бар екені хабарланған.

Сонымен қатар, ол Британиядағы «Evoshave Limited» компаниясын жою процесін бастаған. Компания бір кездері қырыну құралдарын шығарып, ресейлік миллиардер Михаил Фридманның ұлы Александр Фридманмен серіктес болған. Кейін Фридман Батыс елдерінің санкцияларына іліккен.

Бүгін, 14:37