Ыстанбұлда есірткіге қарсы операция кезінде танымал актриса Ханде Эрчел қамалды

Ыстамбұлда бір түнде есірткіге қарсы операция барысында 14 адам тұтқындалды, олардың арасында танымал актриса және модель Ханде Эрчел бар. Операцияны есірткіге қарсы күрес бөлімшелері бір мезгілде 16 жерде жүргізді. 

Түркияның Haberler.com басылымы жариялаған ақпаратқа сәйкес, тергеу бірнеше ауыр айыптарды қамтиды, оның ішінде есірткіні өндіру және тарату, олардың қолданылуын жеңілдету, пайдалану мақсатында сақтау және жезөкшелік ұйымдастыруға қатысу. Ұсталғандардан бөлек тағы екі күдікті іздестіріліп жатыр. 

Ханде Эрчелдің бұл істегі рөлі туралы ресми мәліметтер әлі ашылмағанымен, оның қамауға алынуы қазірдің өзінде бұқаралық ақпарат құралдары мен әлеуметтік желілерде қызу пікірталас тудырды. 

Ханде Эрчел 1993 жылы 24 қарашада Балыкесир провинциясының Бандырма қаласында дүниеге келген. Ол актерлік мансабын 2014 жылы бастады және тез арада түрік теледидарындағы ең танымал тұлғалардың біріне айналды. Актерлік өнермен қатар, Эрчел модельдікте де жетістікке жетіп, халықаралық сұлулық байқауларында Түркияның атынан шықты. 

Қазіргі таңда 32 жастағы актриса түрік телеиндустриясында кең танымалдылыққа ие. Оның қатысуымен түсірілген жобалар жергілікті телеарналарда тұрақты көрсетіліп, әлеуметтік желілерде белсенді талқыланады. Эрчелдің жанкүйерлерінің саны көп.

Эрчел шетелде, соның ішінде Қазақстанда да танымал. «Есігімді қағып» (түрікше: «Sen Çal Kapımı») сериалының сәтті шығуының арқасында актриса қазақстандық көрермендер арасында кең аудиторияға ие болды. 

Бұдан бұрын Түркияда киберқылмысқа қарсы ауқымды рейд жүріп, 360 күдікті ұсталғанын хабарлағанбыз.