Заң мен тәртіп: тұрғындарға тегін кеңес берілді

Астанадағы ірі сауда орталықтарының бірінде мамандар тұрғындарға тегін құқықтық кеңес берді.

Акция «Заң мен тәртіп» қағидаты аясында ұйымдастырылып отыр. Онда тұрғындар баспана, жұмыспен қамту, әлеуметтік қолдау және мемлекеттік қызмет салаларына қатысты мәселелерін қозғады.

Сауда орталығында тұрғындар үшін бұл жолы тауарлар ғана емес, құқықтық кеңес те алу мүмкіндігі туды. Оның үстіне бұл қызмет түрі тегін ұсынылды. Қаз-қатар тізілген үстелдің әрқайсысында әр саланың маманы отыр. Сондықтан бір алаңда бірнеше сауалға кешенді түрде жауап алуға болады.

Шара Мұхамедшәкірова, зейнеткер:

- Халықпен мұндай кездесу дұрыс деп ойлаймын. Халық өз құқығын білетін болады. Сондықтан мамандарға рахмет.

Мирас Әбдірахман, Қалалық Ішкі саясат басқармасы басшысының орынбасары:

- Халқымызға «Заң және тәртіп» идеологиясын ілгерілету, түсіндіру мақсатында өткізіледі. Қалалық департаменттер, қала әкімдігінің құрылым мүшелері қатысып жатыр. Келіп жатқан адамдар мемлекет тарапына жататын сұрақтарға кеңес алу мүмкіндігі бар.

Акция халықтың құқықтық сауатын арттыруға бағытталған. Оны қала әкімдігі мен прокуратура бірлесе ұйымдастырып отыр. Тұрғындар тарапынан қойылған сауалдар сан саланы қамтыды. Бірі баспана мәселесімен келсе, тағы бірі медициналық және мемлекеттік қызметтерге қатысты кеңес алды.

Әйгерім Өмірзақова, Астана Прокурорының аға көмекшісі:

- Бұл жерде азаматтар кез келген сұрақтар бойынша келіп, құқықтық кеңестер ала алады. Әлеуметтік қолдау көрсету, тұрғын үй саласындағы, білім саласындағы және денсаулық сақтау саласындағы сұрақтар қойылады.

Құқықтық кеңес алуға асыққан тұрғындардың қарасы аз болған жоқ. «Заң мен тәртіп» қағидаты шеңберінде өткізілетін шаралар легі мұнымен шектелмейді. Мамандар акцияларды түрлі форматта өткізуді жоспарлап отыр.

Авторлары: Еркебұлан Смадияров, Қанат Махмұтов