Заңсыздықтың алдын алу: Мәжіліс жаңа заң жобасын мақұлдады

Министрдің айтуынша, заң жобасы Президент тапсырмасы бойынша әзірленді. Онда құқықбұзушылыққа ықпал ететін себептерді жоюға назар аударылады.

– Бір бағытта бес заң біріктіріледі. Ол профилактика туралы, тұрмыстық зорлық-зомбылық, кәмелетке толмағандар, азаматтардың тәртіпті сақтауға қатысуы және әкімшілік қадағалау туралы заңдар. Профилактика барлық деңгейде қамтамасыз етілуі керек. Бұл тәсілдер заң жобасында көзделген. Біріншіден, ортақ жауапкершілік енгізіледі. Әкімдер өңірдегі құқықтық тәртіптің жай-күйі үшін, мемлекеттік органдар құзіреті бойынша профилактика үшін, мәслихаттар олардың есебін тыңдау бойынша және ақсақалдар, жұртшылық кеңестері секілді жергілікті қоғамдастықтардың рөлі күшейтіледі, – деді министр Мәжілістің жалпы отырысында.

Екіншіден, профилактика жөніндегі ведомствоаралық комиссияның мәртебесі жоғарылайды. Енді комиссияның құрамы мен құзыретін Президент бекітеді. Баға ұлттық баяндамада беріледі.

– Үшіншіден, профилактика жасалатын субъектілер тізбесі 13-тен 26-ға дейін кеңейтіледі. Олардың идеологиялық түсіндіру және тәрбие жұмысы, әлеуметтік бейімдеу және оңалту, цифрлық шешімдерді енгізу бойынша құзыреттері нақтыланады. Сондай-ақ азаматтардың, кәсіпкерлердің профилактикаға қатысу тәсілдері бекітіледі. Енді барлық құқық қорғау органдары қоғамдық көмекшілер тарта алады, – дейді Е.Сәденов.

Сонымен бірге, жеке профилактика шаралары күшейтіледі. Профилактикалық бақылауға жататын есепке алынған адамдардың тізбесі 6-дан 16-ға дейін кеңейтіледі. Әкімшілік қадағалауды қолдану саласы ұлғайтылады.

– Жаңа тетіктер де енгізіледі: ресми ескерту, өмірлік қиын жағдайдағы адамдарды есепке алып, олардың әлеуметтік бейімдеу және оңалту, жоғары назарды талап ететін жасөспірімдерді педагогикалық сүйемелдеу, жақындауға тыйым салу, ілеспе заң жобалары шеңберінде әкімшілік жауапкершілік, құқыққа қарсы контентті жариялау және тарту үшін енгізіледі, – деді ведомство басшысы.

Заңнама нормаларына Әлеуметтік кодекс және үш заң сәйкес келтіріледі.

Заң жобасы қоғам қайраткерлерінің, құқық қорғаушылардың, ғалымдар мен сарапшылардың қатысуымен әзірленген. Көпшілік тыңдаулар өтті, сараптамалар жүргізілді, Президент Әкімшілігімен келісілді, Парламенттің қоғамдық палатасының отырысында қаралды.

Негізгі заңға ілеспе ретінде «ҚР кейбір заңнамалық актілеріне құқықбұзушылық профилактикасы мәселелері бойынша өзгерістер енгізу туралы» және «ҚР Әкімшілік құқық бұзушылық туралы кодексіне құқықбұзушылық профилактикасы мәселелері бойынша өзгеріс пен толықтырулар енгізу туралы» заң жобалары мақұлданды.

Айта кетейік, жаңа заң жобасы қолданыстағы бес заңның нормаларын біріктіреді және бірыңғай профилактика жүйесін құруға бағытталған. Сондай-ақ оған профилактиканың арнайы және қылмыстың салдарын зерттеу шаралары енгізіледі. Бұл туралы депутат Магеррам Магеррамов Kazinform тілшісіне арнайы сұхбат берген еді.

Бұған дейін Мәжіліс радиоактивті қалдықтармен жұмыстың тәртібін нақтылайтын заң жобасын назарға алды.