“Жай ғана қаладым“ жолаушы ұшу кезінде апаттық шығу есігімен және бортсеріктермен төбелесті

Batik Air әуекомпаниясы ұшағының жолаушысы ұшу кезінде апаттық есікті ашуға тырысқан. Ер адам терезе панелін зақымдап, иллюминаторды теуіп, өзге жолаушыларды қорқытқан. Оны бортсеріктер мен бірнеше жолаушы тоқтатты, - деп хабарлайды Tengri Travel.

Оқиғаның кадрларын News.com.au басылымы жариялады. Видеода 36 жастағы ер адамның апаттық жағдайда шығу есігін бұзуға тырысып, иллюминаторды тепкілеп жатқаны көрінеді. Кейін ол жолаушыларға қоқан-лоқы көрсете бастаған.

@news.com.au Куала-Лумпурдан Үндістанға бағыт алған рейсте жолаушы апаттық есікті ашуға тырысқанда дүрбелең басталды. Ұйықтап жатқан жолаушылар күдікті терезені қайта-қайта тепкен кезде шыққан қорқынышты ысылдаған дыбыстан оянып кеткен. 36 жастағы ер адам қоқан-лоқы көрсете бастағанда бортсеріктер мен жолаушылар оны ұстап алды. Ұшақ Кочиге аман-есен қонды, онда полиция оның себебін анықтау үшін ер адамды қамауға алды. #plane #апаттықесік #рейс #қауіп #кабина ♬ түпнұсқа дыбыс - News.com.au

The Indian Express мәліметінше, оқиға Batik Air әуекомпаниясының OD231 рейсінде болған. Ұшу кезінде 12A орнында отырған 36 жастағы жолаушы алдымен апаттық жағдайда шығу терезесі панелін теуіп зақымдаған. Содан кейін есікті ашуға тырысқан.

Бірнеше жолаушы мен экипаж мүшелері араласып, оны тоқтатуға тырысқан. Полиция мәліметінше, ер адам қарсылық көрсетіп, кедергі жасамақ болғандарға сес көрсеткен. Нәтижесінде ұшу аяқталғанша оны ұстап тұрған.

Ұшақ шамамен сағат 23:10-да Кочи әуежайына аман-есен қонды. Қонғаннан кейін ер адамды Үндістанның Орталық өнеркәсіптік қауіпсіздік күштерінің (CISF) қызметкерлері ұстап, кейін полицияға тапсырды.

Жолаушының мұндай әрекетке бару себебі әлі анықталып жатыр. Үндістандық БАҚ мәліметінше, алдын ала тергеу кезінде ер адам өз іс-әрекетінің нақты себебін айта алмаған. Кейбір басылымдарда оның "жай есікті ашқысы келгені" туралы сөздері келтірілген.

Жолаушыда аллергия ұстамасы болуы мүмкін деген нұсқаға ресми растау жоқ, сондықтан оқиғаға дәл осы себеп болды деп айтуға әлі ерте.

Ұсталғаннан кейін ер адамға қатысты тергеу басталды. Кейін Керала полициясы оған "кісі өлтіруге оқталу" айыбын да қосты, өйткені оның әрекеттері борттағы адамдардың өміріне қауіп төндіруі мүмкін еді.

Google News арқылы жаңалықтарымызды қадағалаңыз