Жамбыл облысында су ысырабы 80% ке дейін азаяды

Су нысандарын қайта жаңғыртуды қолға алған өңірдің бірі – Жамбыл облысы. Мұнда республикалық меншіктегі 400-ден астам су каналы бар. Мұнда Еуропалық банктің қолдауымен 650 шақырымды құрайтын 34 құрылыс жобасы аяқталуға жақын.

Қазіргі таңда 15 каналды жөндеу ғана қалды. Жергілікті Қазсушар мекемесінің мәліметі бойынша бұл жұмыстар вегетациялық маусымға дейін бітеді. Еуразиялық даму банкінің қаржысы есебінен Жамбыл облысындағы су арналарының 300 шақырымын жөндеу келесі жылы аяқталады. Бұл судың ысырабын 40%-тен 80%-ке дейін азайтуға мүмкіндік береді.

Әлішер Көшербаев, «Қазсушар» РМК Жамбыл облысындағы филиалының бөлім басшысы:

- Одан бөлек облыс көлемінде Ислам даму банкі қаржысы есебінен, бірінші транш есебінен 72 каналды қайта жаңғырту жұмысы жоспарланған. Бүгінгі күні конкурстық рәсімдеу жүргізіліп жатыр. Аталған жұмыстар 2026 жылы іске асырылады. Аиталған Ислам даму банкі аясында 420 шақырым канал толығымен бетонмен қапталып, су ысырабын 50-60%-ке дейін азайтып, каналдың пайдалы әсер коэффициентін 95 жоғарылатуға мүмкіндік туады.

Су үнемдеу технологиясының игілігі

Айта кету керек, суару технологиясының игілігін Жамбыл өңіріндегі шаруалар әлден-ақ көріп жатыр. Солардың бірі – Алтынбек Керімқұл. Бірер жыл бұрын шаруа 6 ұңғыма қаздырып, тамшылатып суару желісін орнатқан еді. Осы мақсатқа жұмсалған қомақты қаржының жарымын мемлекет субсидиялапты. Қазір қожалығына қарасты 700 гектар жері бар. Соның су бармайтын тау бөктеріндегі 300 гектарында тамшылатып және жаңбырлатып суару әдісін қолданады. Шаруа бұрын игерілмеген жерден пияздың мол өнімін алып отырғанын айтады.

Керімқұл Алтынбек, Ақкөл шаруа қожалығының басшысы:

- Мына 100 гектар жерді жаңбырлатып суаратын не бар? 450 метрге дейін «шлангымен» тартып апарып тастайды. Содан бері қарай автоматты түрде өзі тартып отырады. Екі жанына шашып отырады. Аяғына келгенлде қайта ауыстырып апарып тастайды. Бір-ақ адам басында тұр. Моторист сол отыр. Өте пайдалы. Жаңбырлату технологиясының пайдасы сол. Ол суды үнемдейді. Су жетпейтін жерге соны пайдаланып отырмыз.