Жамбылда қоян аулауға барған 13 жастағы балаға оқ тиіп, ажал құшты

Жамбыл облысының Мойынқұм ауданына қарасты Қүшаман ауылында түнгі аңшылыққа шыққан екі жасөспірімнің бірі абайсызда оққа ұшып, қаза тапты, – деп хабарлайды Aikyn.kz сайты.

Алдын ала мәліметке сәйкес, 13 жастағы екі сыныптас бала түнде өз бетінше қоян аулауға шыққан.

– Жасөспірімдер қоян атып жүрген. Балалардың бірі жаралы қоянды іздеп барған сәтте, екіншісі оны тоқтатпақ болып қайта оқ атқан. Сол оқ қасындағы досына тиген, – дейді ауыл тұрғындары.

Қайғылы жағдайдан кейін ауылда үрей мен ауыр күйзеліс орнады. Тұрғындар бұл оқиғаны абайсыздық пен ересектер тарапынан бақылаудың болмауынан деп отыр.

Жамбыл облысы Полиция департаменті бұл дерек бойынша абайсызда адам өліміне әкеп соққан баппен сотқа дейінгі тергеу бастағанын мәлімдеді.

– Полиция күдіктіні анықтап, бөлімшеге жеткізді. Тергеу амалдары толық әрі объективті жүргізіліп жатыр. Сонымен қатар ата-аналардың балаларды қараусыз қалдырып, атыс қаруына қол жеткізуіне жол бергені үшін олардың да жауапкершілігі қарастырылуда, – делінген полиция хабарламасында.

Аудан тұрғындарының айтуынша, бүгін Мойынқұмның орталық алаңында халық көп жиналған. Бұл жағдайдың аталған оқиғамен байланысы әзірге ресми түрде расталған жоқ.