Жанабыловтар ісі: Блогерлерге қатысты сот үкімі шықты

Соңғы сөзінде Эльмира Төлегенова процессуалдық келісім жасау туралы өтініш білдірген. Прокурор бұған қатысты ұстанымын жария етті.

Оның айтуынша, айыпталушылар мен прокурор арасында кінәні мойындау туралы мәміле түрінде процессуалдық келісімге қол жеткізілген.

Келісімді ескере отырып, прокурор Ерболат Жанабыловқа екі жыл шартты түрде бас бостандығынан айыру жазасын сұрады.

Ал Төлегеноваға мемлекеттік айыптаушы екі жыл бас бостандығынан айыру жазасын тағайындап, оның орындалуын екі жылға кейінге қалдыруды сұрады.

Қорғау тарапы бас бостандығынан айырудан өзге жаза тағайындауды өтінді.

Сондай-ақ, прокурор айыптау тарапы азаматтық талап-арыздан бас тартқанын мәлімдеді. Өйткені, қорғау жағы келтірілген залалдың өтелгенін растайтын құжаттарды ұсынған.

Сот үкімімен ерлі-зайыпты блогерлер Қылмыстық кодекстің екі бабы бойынша кінәлі деп танылды. Олар — 214-бап «Заңсыз кәсіпкерлік», 218-бап «Қылмыстық жолмен алынған ақша қаражатын заңдастыру (жылыстату)».

Сот Ерболат Жанабыловқа 2 жыл шартты түрде бас бостандығынан айыру жазасын тағайындап, пробациялық бақылау белгіледі. Сондай-ақ, оның мүлкі тәркіленеді.

Эльмира Төлегеноваға сот 2 жыл бас бостандығынан айыру жазасын тағайындап, жазаны ең төменгі қауіпсіздік мекемесінде өтеуді және мүлкін тәркілеуді белгіледі. Сонымен қатар, оның кәмелетке толмаған үш баласының болуына байланысты жазаны өтеу 2 жылға кейінге қалдырылды.

Айта кетейік, ерлі-зайыптылар 247 653 229,5 теңге көлеміндегі келтірілген залалды өтеген. Осыған байланысты сот азаматтық іс бойынша өндірісті тоқтата тұру туралы шешім қабылдады.

— iPhone 16 маркалы, жады 528 гигабайт 17 ұялы телефон, сондай-ақ Hyundai Elantra маркалы 8 автокөлік мемлекет меншігіне тәркіленсін, — деді судья.

Сонымен қатар, сот үкім заңды күшіне енгеннен кейін Lamborghini Urus және Lexus RX 600 маркалы автокөліктерге салынған тыйым алынып тасталатынын мәлімдеді.

Сот айыпталушылардан жәбірленушілерге өтемақы қорына 20 АЕК мөлшерінде, яғни 78 640 теңге мәжбүрлі төлем өндіру туралы қаулы етті.

Бұдан бөлек, үкімге сәйкес, Жанабыловқа пробация қызметін хабардар етпей тұрғылықты жерін және жұмыс орнын өзгертуге, келісімсіз өңірден шығуға, сондай-ақ жұмысқа байланысты емес жағдайда алкоголь ішуге рұқсат етілген ойын-сауық орындарына баруға тыйым салынады.

Оған медициналық мақсаттан тыс психоактивті заттарды қолдануға тыйым салынады және түнгі уақытта үйде болуға міндеттеледі. Жұмыссыз болған жағдайда ол жұмыспен қамту органдарына тіркелуі тиіс.

Айта кетейік, 2025 жылы 11 автокөлікті ұтысқа қойып, курс сатқан блогерлер Ерболат Жанабылов пен Эльмира Төлегенованың әрекеті Қазақстан Туризм және спорт министрлігі назарына іліккен болатын.

2025 жылдың 16 қазанында блогер Жанабыловтарға қатысты қылмыстық іс қозғалды.

2026 жылы 13 наурызда Жанабыловтар ісі сотқа жолданды.

Прокурор блогер Жанабылов пен әйелін 4 жылға соттауды сұраған болатын.