Жаңартылатын энергия саласында бес кәсіби стандарт әзірленіп жатыр

АСТАНА, 29 қазан – Sputnik. Қазақстанда жаңартылатын энергия көздері саласына арналған алғашқы бес кәсіби стандарттың жобасы дайындалды. Бұл туралы Энергетика министрлігінің жаңартылатын энергия көздері саласындағы Кәсіптік біліктіліктер жөніндегі салалық кеңесінің отырысында айтылды.

Жобалар күн және жел энергетикасы, сондай-ақ жасыл сутекті электрохимиялық өндіру бағыттарын қамтиды.

"Құжаттарда күн және жел электр станцияларын жобалау, салу, пайдалануға беру, пайдалану және техникалық қызмет көрсету мамандарына қойылатын біліктілік талаптары белгіленеді", - деп жазылған Энергетика министрлігінің хабарламасында.

Кәсіби стандарттарды әзірлеу кезінде энергетиканы цифрландыруға қатысты талаптар да ескерілген. Атап айтқанда, цифрлық мониторинг жүйелерін, автоматтандырылған басқаруды, өндірістік деректерді талдауды және жасанды интеллект құралдарын қолдану мәселелері қамтылған.

Отырыс барысында 2027-2029 жылдарға арналған жаңартылатын энергия көздері саласындағы біліктіліктер мен дағдылар жүйесін дамыту жөніндегі салалық жоспар да қаралды. Құжат саланың болашақтағы кадр қажеттіліктерін ескеріп, мамандар даярлауды жетілдіруге бағытталған.

Алдағы уақытта бес кәсіби стандарттың жобасы көпшілік талқылауы үшін "Ашық нормативтік құқықтық актілер" порталына орналастырылады.