Жәнібек Әлімханұлы допинг дауына ілікті: боксшының өзі не дейді

АСТАНА, 3 желтоқсан – Sputnik. Орта салмақта WBO және IBF тұжырымдарының чемпионы Жәнібек Әлімханұлының қанынан допинг табылды. Боксшының өзі бұл жаңалықты естіп, таңғалғанын айтты, деп хабарлайды Sputnik Қазақстан.

"Мен әрқашан таза спортты қолдаймын. Мұны жақсы білесіздер. Мен таза спортты насихаттап жүргенімді де білесіздер. Жаңалықты оқып таңғалып отырмын. VADA бірінші рет анализ алып, бәрі таза деп еді. Мен витаминдеріме де, тамағыма да ешқандай өзгеріс енгізбедім. Екінші рет тесте неге мұндай болғанын түсінбей отырмын, біз қайта анализ тапсыруға өтініш айттық. Жауабын күтіп отырмыз!", - деп жазды Әлімханұлы әлеуметтік желідегі парақшасында.

Еске сала кетейік, Жәнібектің кубалық Эрисланди Ларамен жекпе-жегі 6 желтоқсанда (Астана уақытымен 7 желтоқсанда) АҚШ-тың Сан-Антонио қаласында өтуге тиіс еді.

Қазақстандық чемпион соңғы жекпе-жегін 2025 жылдың сәуірінде өткізіп, француз Анауэль Нгамиссенгені (14–1, 9 KO) сенімді түрде жеңген еді.