Жастар тәрбиесі баршаға ортақ міндет

Абай облысының қоғам өкілдері әлеуметтік желіде жастар көретін контентті реттеу керек дейді. Әйтпесе тәрбие ақсап, жас ұрпақтың болашағына қауіп төнуі мүмкін.

Семейге жұмыс сапарымен барған Мәдениет және ақпарат вице-министрі Қанат Ысқақовпен кездесуде осындай маңызды мәселелер айтылды. «Ес-аймақ» рухани орталығында өткен шараға қоғам белсенділері, зиялы қауым, жастар және тұрғындар қатысты. Олар интернеттегі мәдениет пен этиканы сақтауға қатысты сауалдарын қойды. Сондай-ақ өңірдегі мәдени инфрақұрылымның қолжетімділігі жөнінде сөз қозғады.

Вице-министр Қанат Ысқақов әр қатысушының пікірін тыңдап, көтерілген мәселелердің жергілікті қауымдастықпен бірлесе шешілетінін атап өтті. Оның айтуынша, министрлік аймақтармен кері байланысты күшейтуді жалғастырады. Сондай-ақ Қанат Ысқақов биыл атқарылған жұмыстар, алдағы жоспарлар мен  саладағы негізгі басымдықтарға кеңінен тоқталды.

Қанат Ысқақов, ҚР Мәдениет және ақпарат вице-министрі:

- Басты сұрақтарымыздың бірі біздің салт-дәстүріміз, жастар саясатының мәселелері қаралды. Қазіргі ақпараттық кеңістікте болып жатқан тәуекелдер, соның ішінде әлеуметтік желіде болған оқиғалар. Жасанды интеллект, креативті индустрия сұрақтары толығымен қаралды. Өте нәтижелі кездесу болды. Абай облысы рухани, мәдени орталығының бірі.

Жиында ақпараттық кеңістікті реттеу, жастар тәрбиесіне ықпал ететін контенттің сапасын арттыру, мәдени шаралардың қолжетімділігін қамтамасыз ету сынды тақырыптар көтерілді. Қатысушылар  интернеттегі көзқарас мәдениеті мен этиканы сақтау мәселесіне ерекше назар аударды. Қоғам белсенділерінің айтуынша, әлеуметтік желінің пайдасы болғанымен, зияны да жоқ емес. Кейбір контент жастардың санасына кері әсерін тигізеді. Жалпы шарада ұлттық тәрбие мен рухани азық туралы көп айтылды.

Айман Боқбасарова, «Айша бибі» қоғамдық бірлестігінің төрайымы:

- Біздің асыл мұрамыз ұлттық қолөнерді дамыту. Оны мектептерде жаңғырту, ұстаздарды дайындап, атақты қазақтың қолөнерін дамыту керек. Мектептерден бастап үйрету керек деп ойлаймын.

Кездесу соңында вице-министр көтерілген ұсыныстардың ескерусіз қалмайтынын айтты. Тұрғындар мен министрлік арасындағы осындай ашық диалог қоғам мен мәдениеттің дамуына жаңа серпін береді,-дейді жиналғандар. Әсіресе жастар тәрбиесі мен ақпараттық ортаның тазалығын қамтамасыз ету маңызды бағыттарының бірі болмақ.

Авторлары: Рүстем Қайратұлы, Медет Өмірханов