“Жасым 40 та, мен қайтадан студентпін“ Көкшетау тұрғыны ескі арманы туралы айтып, Қазнетті шабыттандырды

Көкшетау тұрғыны Юлия Данчук 40 жасында өмірін түбегейлі өзгертіп, медициналық білім алуға бел буды. Ол ҰБТ тапсырып, 76 балл жинады және университеттің ақылы бөліміне оқуға түсті. Енді ол жеті жыл оқиды, содан кейін жалпы тәжірибе дәрігері болуды жоспарлап отыр, деп хабарлайды Tengri Life.

Неден басталды?

Юлия Ресей тумасы, бірақ 2008 жылдан бері Қазақстанда тұрады. Көкшетауға болашақ жарымен танысқаннан кейін көшіп келген.

"Ерекше ештеңесі жоқ, ғашық болдым. Ол Омбыда оқыды, өзі Көкшетаудың тумасы, сосын мен де осында көшіп келдім", - дейді Юлия.

Медициналық университетке түсу идеясы бірден келе қоймаған. Instagram-дағы видеосында ол ҰБТ-ға дайындығы туралы айтып, жаңа кезеңге қадам басуға әлі де жүрексініп жүргенін мойындаған еді.

Instagram-дағы бұл жазбаны көру

A post shared by Юлия | Нутрициолог ЖКТ Фитнес Йога Гентест (@danchuk.nutriciolog.yoga)

Ақыры Юлия емтиханды сәтті тапсырып қана қоймай, 76 балл жинады - бұл оқуға түсуге жеткілікті нәтиже.

"Мен шекті балды жинадым. Шынымды айтсам, оны жинаймын деп жоспарламаған едім. Қолымнан келгеннің бәрін істеймін, егер түсе алмасам, бұл мен үшін: "барымды салдым" деген сылтау болады деп ойладым. Бірақ мен оқуға түстім, сондықтан осындай видео шықты - бұлай боларын өзім де күтпеген едім", - дейді ол.

ҰБТ-ға дайындалуға әйелдің небәрі бір ай уақыты болған. Ең қиын пәндердің бірі Қазақстан тарихы болды: Юлия бұрын Ресейде оқығандықтан, бұл пәнді мүлдем өтпеген.

"Мен бар болғаны бір ай дайындалдым. Мектепте жақсы оқығанмын ба, әлде бұл тағдыр ма, білмеймін", - дейді ол.

Неге дәрігер болуға шешім қабылдады?

Юлияның алғашқы мамандығы - география және информатика пәнінің мұғалімі. Алайда ол мамандығы бойынша жұмыс істемеген. Он жылға жуық уақыт бойы әйел нутрициологиямен айналысып, йога нұсқаушысы болып жұмыс істейді.

Дәл осы кәсіп пен адам ағзасының құрылысына деген қызығушылық оны медициналық білім алуға итермелеген.

"Жаттықтырушылықта бұл анатомия болса, нутрициологияда маған әрқашан мүшелердің жұмыс істеу процесі қызық болатын. Маған ағзаға тұтас жүйе ретінде қараған ұнайды: жекелеген дәрігерлер - көз, жүрек, жүйке жүйесі емес, адам денесіне холистикалық көзқараспен қарау, яғни дененің біртұтас екенін және бәрі өзара байланысты екенін түсіну маңызды. Сондықтан биылғы жазда оқуға түсуге тәуекел еттім", - деп ағынан жарылды ол.

Енді ол жалпы тәжірибе дәрігері мамандығы бойынша білім алуды жоспарлап отыр.

Жақындары қалай қабылдады?

Юлияның оқуға түсуі отбасы үшін үлкен оқиға болды. Күйеуі мен үш баласы оның қайтадан студент болу шешімін қолдады.

Балалары тіпті анасы оқуын бітірген кезде өздерінің неше жаста болатынын есептей бастаған.

"Балалар ерекше қуанды: кейбіреулері өздері университетке түсетін кезде менің әлі оқып жататынымды немесе енді бітіретінімді, ол кезде өздерінің нешеде болатынын есептеп те қойды", - дейді ол.

Юлия бұл шешімді қабылдау оңай болмағанын айтады: медициналық оқу үйреншікті өмір салтын түбегейлі өзгертуді талап етеді. Соған қарамастан, ол бағын сынап көруді ұйғарды.

"Егер арманың болса, оған ұмтылу керек"

Юлияның оқиғасы әлеуметтік желіде қызу талқыланды. Оның ҰБТ тапсырғаны туралы видеосы 200 мыңнан астам қаралым жинады.

Пікірлерде қолданушылар 40-тан, тіпті 45-тен асқанда оқуға түскен өз тәжірибелерін бөлісті. Көпшілігі әйелді қолдаса, кейбіреулері өмірін өзгерткісі келетінін, бірақ әлі батылы бармай жүргенін мойындады.

"Көбісі 40-тан, тіпті 45-тен кейін де оқуға түсіп жатқандарын және бұған еш өкінбейтіндерін жазып жатыр. Шешім қабылдай алмай жүрген аз ғана адам бар. Яғни, мен оларды ынталандырғандай болдым: егер арманың болса, оған ұмтылу керек", - дейді ол.

Енді оны алда жеті жыл оқу мен жаңа мамандық күтіп тұр. Юлия өз оқиғасы арқылы жас мөлшері өзгерістерге кедергі болмауы керек екенін көрсеткісі келеді - кейде бәрін 40 жаста да жаңадан бастауға болады. Бастысы - өз мүмкіндіктеріңді бағалау, жақындарыңның қолдауына ие болу және тәуекел етуден қорықпау.

Айта кетейік, оқуды зейнет жасында да бастауға болады. 2025 жылы Петропавлдың 72 жастағы тұрғыны заңгерлік білім алу үшін университетке түсті. Зейнеткер дәрістерге күн сайын баруды жоспарлап отырғанын және осылайша өзінің көптен күткен арманын орындағанын айтты.

Google News арқылы жаңалықтарымызды қадағалаңыз

Жазылу