Жиналмалы iPhone Duo ның алғашқы иелері ақауларға тап болды: Apple жауап берді

Қазақстанда бағасы 1,4 млн теңгеден басталатын жаңа жиналмалы iPhone Duo нарыққа шыққаннан кейін бірден күтпеген мәселеге тап болды. Сатып алушылар смартфондардың ішкі экрандарында жарықтар пайда болғанын хабарлай бастады. Кейбір құрылғылар қорабынан шығарылғаннан кейін бірнеше сағаттың ішінде істен шыққан. Apple компаниясы құрылғылардың аз бөлігінде ақау бар екенін ресми түрде мойындап, оларды ауыстыруға уәде берді.

Apple компаниясының алғашқы жиналмалы смартфонының сатылымы 23 қазанда басталды. Алғашқы күндердің өзінде пайдаланушылар әлеуметтік желілерде зақымданған құрылғылардың фотосуреттерін жариялай бастады.

Иелерінің айтуынша, телефонды ашқан кезде ақау пайда болады. Шарнир механизмі қарсылықпен қозғалып, кейде өзіне тән сыртылдаған дыбыс шығады. Осыдан кейін ішкі экранда бүктелетін сызықтың бойымен жарық пайда болады.

Кейбір жағдайларда экранның зақымдануы істен шыққан пиксельдердің жарқын жолағымен қатар жүреді.

Сатып алушылардың бірі жаңа құрылғыны қорабынан шығарғаннан кейін небәрі алты сағат өткенде оның істен шыққанын хабарлады.

26 қазанда Apple компаниясы сатып алушылардың шағымдарына түсініктеме берді.

Компания 9to5Mac басылымына берген мәлімдемесінде iPhone Duo смартфондарының аз бөлігінде ішкі дисплейге қатысты мәселе бар екенін білетінін растады.

Компания сатылған құрылғылардың басым бөлігіне бұл ақау әсер етпегенін атап өтті.

Экраны зақымданған смартфон иелеріне құрылғыны ауыстыру үшін AppleCare қызметіне жүгіну ұсынылды.

Бұл ретте құрылғыны ауыстыру үшін ақылы кеңейтілген AppleCare+ кепілдігінің болуы міндетті емес.

Компания ақауы бар смартфондардың нақты санын жариялаған жоқ.

Мамандар ықтимал себептердің бірі ретінде шарнир механизмінің құрылымын қарастырып отыр.

iFixit сарапшылары жаңа смартфонның құрылымын зерттей келе, шарнирдің кейбір бөлшектері икемді дисплейге шамадан тыс қысым түсіруі мүмкін деген болжам жасады.

Атап айтқанда, мамандардың назарын механизмнің ішінде белгілі бір жағдайларда жеткілікті еркін қозғалмауы мүмкін орталық тірек тақтайшасы аударған.

Бұл телефонды бүктеп, қайта ашу кезінде экранның зақымдануына әкелуі ықтимал.

Алайда Apple әзірге ақаудың нақты себебі шарнир механизмінің құрылымына байланысты екенін растаған жоқ.

Құрылғының сенімділігіне қатысты қосымша күмәнді поляк блогері Kuba Klawiter жүргізген тәжірибе күшейтті.

Тәуелсіз сынақ барысында смартфон арнайы механизмнің көмегімен бірнеше рет бүктеліп, қайта ашылды.

75 мыңнан астам циклден кейін ішкі дисплейде зақымданған пиксельдер жолағы пайда болды.

Егер смартфон иесі оны күніне 100 рет ашады деп шартты түрде есептесек, мұндай цикл саны шамамен екі жыл пайдалануға сәйкес келеді.

Алайда тәжірибе кезінде құрылғыға шаң мен төмен температураның да әсері болды. Сондықтан сынақ нәтижелерін күнделікті қалыпты пайдалану жағдайларымен тікелей салыстыруға болмайды.

Бұған дейін «Ақ Жайық» басылымы Apple компаниясының жаңа жиналмалы смартфоны Қазақстанда шетелдегі ірі нарықтармен салыстырғанда едәуір қымбатқа сатылып жатқанын хабарлаған болатын.

Қазақстанда смартфонның еркін сатылымы 30 қазанға жоспарланған.

Әзірге ақау Қазақстан нарығына арналған құрылғыларда да кездескен-кездеспегені және жергілікті сатып алушылардан осындай шағымдар түскен-түспегені белгісіз.

Apple iPhone Duo смартфондарын жаппай кері қайтарып алу туралы жариялаған жоқ. Компания әзірге ақауы анықталған құрылғыларды ауыстырумен шектеліп отыр.

Бүгін, 17:05