Жол апатынан зардап шеккендерге өтемақы көлемі артуы мүмкін

Мәжілісте міндетті автосақтандыру туралы заңға түзету енгізу мәселесі қаралып жатыр. Қазір сақтандыру компаниялары төлейтін сома көп жағдайда ем-дом мен оңалтуға жұмсалатын шығынды толық өтемейді. Сол себепті депутаттар төлем көлемін арттыруды ұсынып отыр.

— Жаңа түзету қабылданса, жол апатынан қаза тапқан немесе ауыр жарақат алған адамның отбасына 4000 АЕК, яғни шамамен 16 миллион теңге өтемақы төленеді. Ал мүгедек болып қалса, 1-топтағыларға 12 млн, 2-топқа — 9 млн, 3-топқа — 4 млн теңге, ал балалар зардап шексе, оның отбасына 8 млн теңгеге жуық өтемақы беріледі. Жеңіл жарақат алғандарға бұрынғыдай шамамен 1 миллион теңге көлемінде төлем қарастырылып отыр, — делінген телеарна таратқан хабарламада.

Соңғы деректерге сүйенсек, биыл елімізде 26 мыңнан астам жол апаты тіркеліп, 1300-ден аса адам көз жұмған. Мыңдаған адам жарақат алып, мүгедек болып қалған.

Мәжілісмен Нұрлан Әуесбаев Еңбек және халықты әлеуметтік қорғау министріне мүгедектердің жәрдемақысын 85 мың теңгеге дейін көтеру керек деп сауал жолдады. Оның сөзінше, елімізде 725 мың мүгедек адам бар. Бірақ олардың саны әлдеқайда көп болуы мүмкін. Қазір үшінші топтағы мүгедектің жәрдемақысы — 55 474 теңге. Әуесбаев жәрдемақыны кем дегенде ең төменгі жалақы 85 000 теңгеге дейін көтеруді ұсынды.

Сонымен қатар мүгедектікті анықтау процедураларын жеңілдетуді, әлеуметтік көмектерді есептеудің жаңа әдіснамасын әзірлеуді талап етіп отыр. 

Бұдан бұрын хабарланғандай, Мәжіліс халықты сумен таралатын аурулардан қорғайтын халықаралық құжат ратификациясын қабылдады.