Жолаушылар ағыны бойынша көшбасшы әуежайлар белгілі болды

АҚШ-тағы Атланта қаласындағы Хартсфилд–Джексон халықаралық әуежайы әлемдегі ең жүктемесі көп, қарбалас әуежай мәртебесін сақтап қалды: 2025 жылы ол арқылы 106 миллионнан астам жолаушы өткен.

Жолаушылар ағыны бойынша екінші орынды Біріккен Араб Әмірліктеріндегі Дубай халықаралық әуежайы иеленсе, үшінші орында — Токионың Ханэда әуежайы, төртінші — АҚШ-тың Техас штатындағы Даллас/Форт-Уэрт халықаралық әуежайы, бесінші — Қытайдағы Шанхай Пудун халықаралық әуежайы.

Рейтингті Airports Council International (ACI) World ұйымы дайындаған. Ол ұшып кеткен және келген жолаушылар санына негізделген, ал транзиттік жолаушылар тек бір рет есепке алынған.

Атланта әуежайы көшбасшылығын сақтағанымен, оның жолаушылар ағыны 2024 жылмен салыстырғанда 1,6%-ға, ал 2019 жылмен салыстырғанда 3,8%-ға азайған.

Азия-Тынық мұхиты аймағындағы әуежайлар COVID-19 пандемиясының салдарынан әлі де қалпына келе алмай отыр. Токионың Ханэда әуежайы 2024 жылмен салыстырғанда бір сатыға, ал 2019 жылмен салыстырғанда екі сатыға жоғарылаған. Шанхай Пудун әуежайы 10-орыннан 5-орынға көтеріліп, 2019 жылғы (8-орын) көрсеткішінен асып түсті. Ал Гуанчжоу Байюнь әуежайы 2022 жылғы 57-орыннан 2025 жылы 9-орынға дейін көтерілді.

— Әлемдегі ең қарбалас әуежайларды өсіп келе жатқан әуе тасымалы сұранысын күрделі жағдайда тиімді басқарғаны үшін құттықтаймыз.

Бұл ірі тораптық әуежайлар адамдар мен жүктердің қозғалысын қамтамасыз етіп, өз қалалары мен өңірлерінде сауда, туризм және экономикалық өсімді қолдайды.

Өсіп жатқан сұранысқа ілесу үшін үкімет әуежайларға және жалпы авиация саласына ұзақ мерзімді инвестицияларды басымдыққа қоюы қажет, — деді ACI World бас директоры Джастин Эрбаччи.

2025 жылғы Еуропадағы ең қарбалас әуежайлар

2025 жылы жолаушылар саны бойынша әлемдегі ең қарбалас 10 әуежайдың қатарына Еуропадан тек екі әуежай енді.

Лондондағы Хитроу әуежайы 2025 жылы 84 482 126 жолаушыға қызмет көрсетіп, 2024 жылғы 5-орыннан 7-орынға төмендеді.

Одан кейін Ыстанбұл әуежайы орналасқан: 2025 жылы ол арқылы 84 437 710 адам өткен. Рейтингте ол 7-орыннан 8-орынға түскенімен, 2019 жылмен салыстырғанда айтарлықтай өсім көрсетті (ол кезде 28-орында болған).

2025 жылғы ең қарбалас әуежайлар ТОП-10 (жалпы жолаушылар саны бойынша):

Атланта (АҚШ) — Хартсфилд–Джексон халықаралық әуежайы
Дубай (БАӘ) — халықаралық әуежай
Токио (Жапония) — Ханэда әуежайы
Даллас/Форт-Уэрт (АҚШ) — халықаралық әуежай
Шанхай (Қытай) — Пудун халықаралық әуежайы
Чикаго (АҚШ) — О’Хара халықаралық әуежайы
Лондон (Ұлыбритания) — Хитроу әуежайы
Ыстанбұл (Түркия) — әуежай
Гуанчжоу (Қытай) — Байюнь халықаралық әуежайы
Денвер (АҚШ) — халықаралық әуежай

Халықаралық әуе тасымалы қарқынды өсіп отыр

Жалпы алғанда, 2025 жылы халықаралық жолаушылар ағыны 4 миллиард адамға жетіп, 2024 жылмен салыстырғанда 5,9%-ға, ал 2019 жылмен салыстырғанда 8,3%-ға артты.

Жалпы ең қарбалас әуежай болып Атланта қала бергенімен, халықаралық жолаушылар саны бойынша Дубай көш бастап тұр: 95 192 160 адам осы әуежай арқылы ұшып келген немесе кеткен. БАӘ аумағының шағындығына байланысты ел ішінде ішкі рейстер орындалмайды.

Лондондағы Хитроу әуежайы халықаралық тасымал бойынша 79 874 784 жолаушымен екінші орында. Бұл ретте өткен жылы шамамен 4,6 миллион адам оның ішкі рейстерін пайдаланған.
Үшінші орында — Оңтүстік Кореядағы Инчхон халықаралық әуежайы (Сеул қаласына қызмет көрсетеді), төртінші — Сингапурдағы Чанги әуежайы.

Бесінші орынды Нидерландтағы Амстердам Схипхол әуежайы иеленді, ол арқылы 68 767 548 халықаралық жолаушы өткен.

Халықаралық жолаушылар саны бойынша ТОП-10-ға сондай-ақ Ыстанбұл (6-орын), Париждегі Шарль де Голль (7-орын) және Франкфурт (9-орын) әуежайлары да кірді.

2025 жылғы халықаралық жолаушылар саны бойынша ең қарбалас әуежайлар ТОП-10:

Дубай (БАӘ) — халықаралық әуежай
Лондон (Ұлыбритания) — Хитроу әуежайы
Инчхон (Оңтүстік Корея) — халықаралық әуежай
Сингапур — Чанги әуежайы
Амстердам (Нидерланд) — Схипхол әуежайы
Стамбұл (Түркия) — әуежай
Париж (Франция) — Шарль де Голль әуежайы
Гонконг — халықаралық әуежай
Франкфурт (Германия) — әуежай
Доха (Қатар) — Хамад халықаралық әуежайы

ACI World мәліметінше, бір жыл ішінде авиациялық жанармай бағасы 13%-ға төмендеген. Сонымен қатар инфляциялық қысым да әлсіреп, бұл халықтың сатып алу қабілетін қолдап, әуе сапарларына тұрақты сұранысты қамтамасыз еткен.

Айта кетелік Астана әуежайы рейстер кестесін уақытша өзгертеді.