ЖОО лар ЖИ бойынша білім беру бағдарламасын іске асырып жатыр

Елімізде 30 жоғары оқу орны жасанды интеллект бойынша 38 білім беру бағдарламасын іске асырып жатыр.

Қазірдің өзінде 95 университеттің оқу жоспарына арнайы пән енгізілген. Ауқымды жұмыстар президенттің алдағы 3 жылда Қазақстанды цифрлық мемлекетке айналдыру міндетін іске асыру аясында жүргізілген. Бұл туралы орталық коммуникациялар қызметі алаңында Ғылым және жоғары білім министрлігінің өкілдері мәлімдеді. Ақпарларынша, бүгінгі таңда салада нейрондық желілерге негізделген жеке көмекшілерді жасап шығару бастамасы қолға алынған. Олар оқу орындарының қабылдау комиссияларында, дәріс беруші лектор ретінде кітапхана мен психология қызметінде қолданылмақ.

Динара Щеглова, ҚР Ғылым және жоғары білім вице-министрі:

- Қазіргі таңда оқытушылардың біліктілігін арттыру жүріп жатыр. Профессорлық оқытушылардың құрамының 54 пайызы ЖИ бойынша курстардан өтті. Оның ішінде 7757 оқытушы сертификатталған курстардан өтті. Келесі жылы толық қамтуға шығамыз. Әзірленген бағдарламалар әлемдік технологиялық трендтерге сәйкес келеді.