Жұмыс істеуге келетін шетелдіктер үшін бірыңғай салық енгізу жоспарланып отыр

АСТАНА, 24 сәуір – Sputnik. Қазақстанда 2026 жылы жұмыс істеуге келетін шетелдіктер үшін бірыңғай салық енгізу жоспарланып отыр, деп хабарлады еңбек және халықты әлеуметтік қорғау министрі Асқарбек Ертаев.

Бұл салық режимі жеңілдетілген тәртіпке кірмейтін шетел азаматтарына қолданылады. Яғни Еуразиялық экономикалық одақ (ЕАЭО) елдерінің азаматтарына, инвесторларға және елде сұранысқа ие мамандық иелеріне қатысты емес.

Бүгінде жеңілдетілген тәртіпке кірмейтін шетелдіктер квота арқылы тартылады: жыл сайын Еңбек министрлігі заңды тұлғаларға (компанияларға) және жеке тұлғаларға арналған екі квотаны бекітеді.

Министрдің айтуынша, осы екі квота біріктіріліп, бір жүйеге келтіріледі және шетелдік жұмысшылар үшін бірыңғай салық мөлшерлемесі белгіленеді.

"Кейде заңды тұлғалар (компаниялар) жеке тұлғаларға жұмыс істеу үшін келген мигранттарды тартады, себебі онда мөлшерлеме төмен. Бізде жеке тұлға шетелдік жұмыс күшін тартса, онда ставка 7 АЕК болады. Яғни мигрант төлеп, елімізге кіреді, бірақ іс жүзінде заңды тұлғада жұмыс істейді.

Енді осындай жағдай болмау үшін біз екі квотаны бір квотаға біріктіріп, бірыңғай салық мөлшерлемесін енгіземіз", — деді министр.

Шетел азаматы бірыңғай салықтық алым төлегеннен кейін, жеке тұлғаларда да, заңды тұлғаларда да жұмыс істей алады.

Бұл өзгерістерге қатысты құжат жобасы басқа мемлекеттік органдарға жіберілген, қазір ол қарастырылып жатыр.