Жүргізуші, сақ бол: Жолда бұлан бар

21 мамырға қараған түні Астана-Щучинск жолында тағы да апат болды. Алдын ала мәліметтер бойынша, Hyundai Tucson жүргізушісі жолдың 95-ші шақырымында бұланға соқтығысқан. Жануар кенеттен жолға жүгіріп шыққан. Апат салдарынан екі жолаушы ауруханаға жеткізіліп, медициналық көмек көрсетіледі.

Жыл басынан бері Ақмола облысында жануарлардың қатысуымен сегіз апат тіркелді. Олардың көпшілігі орман алқаптары мен жабайы аңдардың көші-қон жолдары арқылы өтетін қала маңындағы жолдарда болды.

Полицейлер жүргізушілерден, әсіресе қараңғыда, өте сақ болу керектігін ескертеді.

«Жануарлардың маусымдық көші-қон кезеңінде көлік жүргізушілері «жабайы жануарлар» жол белгілерін көргенде жылдамдықты төмендетуі керек. Әсіресе кешкілік уақытта мұқият болу қажет. Қауіпсіз қашықтықты сақтап, қозғалыс кезінде алаңдамауы керек», - делінген хабарламада.

Жол полияциясы бұланмен соқтығысу жүргізушіге де, көлік ішіндегі жолаушыларға да үлкен қауіп төндіретіндігін ескертеді.