15 жылдық мерейтойын атап өтті

Қазақ тілді журналистика кеңістігінде өз орнын айқындап, оқырманын қалыптастырып үлгерген BAQ.KZ ақпарат агенттігі 15 жылдық мерейтойын атап өтті. Осы уақыт ішінде портал оқырман үшін сенімді дереккөзге айналды. Жедел жаңалықтар, сараптамалық мақалалар, ресми хабарламалар, авторлық контент жасау – бәрі осы платформаның күнделікті жұмысы, деп хабарлайды Egemen.kz.

Мерекелік жиынға портал ашылған күннен бастап еңбек етіп, оның негізін қалаған қызметкерлер арнайы шақырылды. Олар 15 жылдық тарихтың ең қызық әрі күрделі сәттерін еске алып, ізгі тілектерін жеткізді. BAQ.kz порталының алғашқы бас редакторы Қамбар Ахметов ақпараттық сайттың дамуына үлес қосқан әріптестеріне алғыс білдіре отырып, ұжымды құттықтады. 

– Алғаш құрылған кезеңдер есімізде. Біз мұнда қызмет ете бастаған кезде, 2000 жылдардың басындағы мәліметтерді жиі қарап отыратынбыз. Кеше ғана сол деректерге қайта көз жүгіртсек, ол уақытта елімізде шамамен 2 700-ге жуық бұқаралық ақпарат құралы болған екен. Соның бар болғаны 19 пайызы қазақ тілінде жұмыс істепті. Ал 2011 жылы елімізде 6 800-ге жуық сайт тіркелген болса, оның ішінде 617-сі ғана қазақ тіліндегі ресурс болған. Бұл – қазақ интернетінің ең күрделі кезеңдерінің бірі еді. Осындай жағдайда мемлекеттің маңызды қадамының бірі – BAQ.KZ ақпараттық порталын ашу болды.

Алғашқы жылдары облыстық және аудандық газет-журналдарға арнап интернет парақшаларын құру ісін қолға алды. 2015 жылға дейін аймақтық басылымдардың 270-тен астам онлайн нұсқасы осы бастама аясында іске қосылды. Порталдың идеясы мен тұжырымдамасын дайындауға сол кездегі әріптестеріміз үлкен еңбек сіңірді. Мен редактор болып келген кезде бөлмеде бір қызметкер мен бір компьютер ғана болатын. Кейін біртіндеп команда қалыптасып, техника да түгелденді, – деді ол.

Сондай-ақ Қамбар Ахметов ұжымға «Қазақ газеттері» ЖШС төрағасы Дихан Қамзабекұлының арнайы құттықтауын жеткізді. Түрлі министрліктердің өкілдері де BAQ.KZ ұжымына елеулі еңбегі үшін министрлерінің арнайы құттықтауын жеткізді. Олар порталдың қазақ тіліндегі ақпараттық кеңістікті дамытудағы рөлін атап өтіп, ұжымға алдағы жұмыста да табыс тіледі.

Порталдың алғашқы үйлестіруші маманы – Жазира Маратқызы. Ол сайттың ең алғашқы құрылымын реттеп, аймақтармен байланыс орнатқан негізгі маман болған. Жазира Маратқызы сол кезеңде қазақ тіліндегі контентті жүйелеу, редакция жұмысын жолға қою және порталдың күнделікті жұмысын бақылау сынды жауапты міндеттердің басы-қасында жүрген. Шағын командамен басталған жұмысқа жанын салып, агенттіктің қалыптасуына үлкен үлес қосқан. 

– Алғашқы жылдары біз агрегатор рөлін атқардық: қазақ тілінде шыққан барлық жаңалықты, мақаланы, ақпаратты бір жерге жинап, оқырманға ұсынуға тырыстық. Ол үшін аймақтық газет-журналдарға көмек көрсетіп, оларды интернетке шығару ісін қолға алдық. Ең басында сайтқа күн сайын шамамен мың адам кіретін. Бұл біз үшін үлкен көрсеткіш еді. Таңертең жұмысқа келгенде ең бірінші рейтингті қарап, қанша адам сайтқа кіргенін тексеретінбіз. Жарты жыл өтпей, бұл көрсеткіш  10  мыңға жуық болды. Қазақша контентке деген сұраныстың бар екенін сол кезде анық сезіндік, – деді ол.

BAQ.KZ порталын қалыптастырудың алғашқы техникалық кезеңі де оңай болмаған. Қазақ интернеті енді ғана аяқтанып келе жатқан уақытта, порталдың жұмысын жолға қою үшін кәсіби IT мамандардың табанды еңбегі қажет болды. Сол жауапкершілікті мойнына алған маман – Аршат Ораз. Ол BAQ.KZ-дің техникалық құрылымын жасап, порталдың тұрақты әрі қауіпсіз жұмыс істеуіне негіз қалаған.

– Сол кездегі Байланыс және ақпарат министрі Асқар Жұмағалиев болатын. Ол маған арнайы хабарласып, қазақша ақпараттық платформа жасау керектігін айтты. Портал 2010 жылы құрылған кезде қазақ тілінде ақпарат тарататын сайттар өте аз болды. BAQ.KZ сол уақыттан бастап интернет журналистикасының жетекші күшіне айналды деуге болады. Қазақша жаңалық жазатын басқа сайттар болғанымен, көпшілігі үлгі ретінде BAQ.KZ-ды қарап, тақырып қою стилін, сурет орналастыру тәсілін, контентті беру форматын үйренетін еді, – деді ол.

«Baq.kz» ақпарат агенттігінің бас редакторы Мөлдір Бақбергенова қазір жаңа форматтарға бейімделіп, көптілді контентті дамыту, жасанды интеллект технологияларын енгізу, жеделдік пен сапаны қатар ұстау бағытында ауқымды жұмыс жүргізіп жатқандығын атап өтті.

– 15 жылдыққа жаңа жобалармен қадам бастық. Ең үлкен жаңалықтың бірі – 2025 жылдың мамырында орыс тілді жаңалықтар лентасының қосылуы. Бұған дейін агенттік тек қазақ тілінде ақпарат таратып келген болатын. Қазіргі технологиялық кезеңде BAQ.KZ жасанды интеллектіні алғаш игерген медиа ресурстардың қатарында. Қазақ және орыс редакцияларының тілшілері әріптестеріне медиа-тренингтер өткізіп, тәжірибесін бөлісіп жүр,– деді агенттік басшысы.

Сонымен қатар «Qazcontent» АҚ басқарма төрағасы Серғали Абайұлы ақпарат агенттігінің алдағы уақытта ағылшын тілінде де ақпарат тарату жоспары бар екенін атап өтті.

Іс-шара соңында BAQ.KZ ақпарат агенттігі қалыптасу кезеңдері туралы арнайы деректі фильм көрсетілді. Онда алғашқы жылдары атқарылған жұмыс, техникалық және шығармашылық қиындықтар, порталдың бүгінгі деңгейге дейінгі өсу жолы, қазіргі жұмысы көрініс тапты. Сондай-ақ агенттіктің дамуына үлес қосқан мамандарға арнайы марапат табысталды.